İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 98 Hüküm no: 63 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurban Bayramı’nda bütün cami ve mescit minarelerinin kandillerle aydınlatılmasına dair hatt-ı hümâyûn Bâ-sahh? İstanbul Kadısı Fazîletlü Efendi İşbu i‘lâmınız rikâb-ı hümâyûn-ı mülûkâneye lede’l-arz mûcebince leyle-i merkūmede îkād-ı kanâdîl olunmak bâbında hatt-ı şerîf-i tâc-dârî şeref-yafte-i sudûr olmağla mantûk-ı münîfini icrâ eyleyesin deyu Fî 4 Z sene [1]241 Kandîl-i îd-i adhâ Dergâh-ı İslâm-penâh ve bâr-gâh-ı nusret-destgâh-ı turâb-ı kimyâ nisâbına ma‘rûz abd-i dâ‘î-i bî-iştibâh oldur ki işbu sene ıhdâ ve erba‘în ve mi’eteyn ve elf gurre-i Zilhiccetü’ş-şerîfesi henüz bi’r-ru’ye sâbite olamayıp lâkin sene-i mübâreke-i merkūmenin Ramâzanı gurre-i garrâsı sebt gününden rü’yetle kayd-ı cerîde-i sübût ve tekmîl-i selâsîn hesâbı üzere gurre-i münevvere-i Zilhiccetü’l-harâm işbu cum‘a günü mazbûta olduğundan yevm-i mezkûrun sâbıkı Perşembe gecesi rü’yet-i hilâle şuhûd zuhûr etmediği takdîrce şehr-i mezkûrun dokuzuncu sebt günü arefe ve ferdâsı ehad günü îyd-i adhâ-yı meyâmin-i metâyâ olmağla de’b-i dîrîn-i Devlet-i Aliyye dâmet müeyyedeten ve mansûreten bi’l-füyûzâti’r-Rabbâniye üzere leyle-i şerîfe-i îd-i merkūmda tenvîr-i uyûn-ı müminîn için bi’l-cümle minârât-ı cevâmi‘ ve mesâcid îkād-ı kanâdîl-i nûr-efşân ile tezyîn kılınmak tenbîh-i nebîhini nâtık fermân-ı âlî-şân sudûru iktizâ eylediği İstanbul Mahkemesi’nden atebe-i ulyâ-i sipihr-i‘tilâlarına i‘lâm olundu el-emru li-veliyyi’l-emr Fî Gurre-i şehri’l-merkūme li-seneti’l-muharrere