İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 99 Hüküm no: 65 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Avram’ın, ölümünden sonra ailesinin, Yorgi v. Avram’ın ortağı olan Yorgi v. Vasil’den alacakları olduğunu iddia ettikleri 15.000 guruş men‘ Ma‘rûz Mübârek rikâb-ı kamer-tâb-ı hazret-i hilâfet-penâhîye takdîm olunan işbu arzuhâlde mastûru’l-ism olup İstanbul’da Fener Kapısı dâhilinde Petro Kapısı karşısında mütemekkin iken bundan akdem hâlik olan Yorgi v. Avram zimmînin verâseti zevce-i metrûkesi Maryora bt. Yamandi nasrâniye ile sulbî sagīr oğlu Manol ve sulbiye kebîre kızları Zeviye ve Aleniko nasrâniyeler ve sulbiye sagīre kızı Ezmerağda’ya münhasıra ve tashîh-i mes’elesi kırk sehmden olup sihâm-i mezbûreden beş sehmi zevce-i mesfûreye ve on dört sehmi ibn-i mersûma ve yedişer sehmden [22b] yirmi bir sehmi benât-ı mersûmâta isâbeti tahakkukundan sonra şahısları mu‘arrefe bintân-ı mersûmetân Zeviye ve Aleniko nasrâniyeler âsâleten ve zevce-i mesfûre Maryora nasrâniye kendi nefsinden asâleten ve oğlu ve kızı sagīrân-ı mersûmânın vasîleri olmağla vesâyeten Çarşamba günü arz odasında huzûr-ı lâmi‘u’n-nûr-ı vekâlet-penâhîlerinde ma‘kūd meclis-i şer‘-i münîrde kazzâz esnâfından derûn-ı arzuhâlde mersûmü’l-ism diğer Yorgi v. Vasil zimmî muvâcehesinde mûrisimiz hâlik-i mersûm Yorgi zimmî sağlığında mesfûr diğer Yorgi zimmî ile müddet-i medîde ‘ınânen şerîkler olup helâkinden mukaddemce mersûm diğer Yorgi zimmîye varıp ifâde-i hâl eylediğimizde gerek re’s-i mal ve gerek fâide-i hâsıladan zimmetimde şerîkim mersûm Yorgi zimmîye on beş bin guruş deynimdir deyu ikrâr ettikden sonra kable’l-ahz mersûm Yorgi zimmî hâlik olmağla meblağ-ı mezkûr on beş bin guruşu ikrârına binâen mersûm diğer Yorgi zimmîden bi’l-verâse taleb ederiz deyu da‘vâ ettiklerinde ol-dahi cevâbında hâlik-i mersûm ile sağlığında müddet-i medîde şerîkler olduğunu ikrâr edip lâkin bin iki yüz otuz sekiz senesi hılâlînde Çarşı-yı Kebîr’de kazzâz esnâfı lonca odasında kethüdâ ve yiğitbaşı ve ihtiyâr ustalar muvâcehelerinde mersûm Yorgi zimmînin sağlığında fesh-i akd-i şirket-birle hesâblarımızı sehv ve galatdan ârî yegân yegân hesâb-ı sahîh ile rü’yet eylediğimizde benim mersûm Yorgi zimmî zimmetinde sekiz yüz guruş hakkım zuhûr etmişken fakr-i hâline binâen ustalarımız mesfûrûnun recâlarıyla meblağ-ı merkūm sekiz yüz guruş mutâlebesinden meccânen fâriğ olup bi’l-cümle husûs-ı mezkûre ve hukūk-ı şirkete ve hesâbda galat vukū‘una ve sâir beynimizde cereyân eden cemî‘-i ahz ve i‘tâ ve muâmelât-ı şettâ ve hukūk-ı ma‘lûme ve mechûleye müte‘allıka âmme-i da‘vâdan ben mersûm Yorgi zimmînin zimmetini ol-dahi kezâlik benim zimmetimi her birimiz kat‘an hakkımız ve alacağımız kalmamak ma‘nâsına şurût-ı müfsideden ârî uhûd-ı mubtıla ve muvâza‘adan berî cebr ve kerhden hâlî ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eylediğimizden sonra mersûm Yorgi zimmîye ziyâde fakr ve ihtiyâc-târî olduğuna binâen gelip tazallüm-i hâl ettikde müddet-i vâfire hukūk ve müşâreketimiz olduğuna ri‘âyeten malımdan teberru‘an iki bin beş yüz guruş dahi def‘ ve teslîm ve ol-vechile külliyen kat‘-ı nizâ‘ etmişdik deyu sûret-i def‘de eylediği ibrâ-i âm müdde‘âsını asîl ve vasiyy-i mersûmân külliyen inkâr etmeleriyle dâfi‘-i mersûm diğer Yorgi zimmî ber-vech-i muharrer ibrâ-i âm müdde‘âsını lede’t-tezkiyye adl ve makbûlü’ş-şehâde idükleri ihbâr olunan kazzâzân kethüdâsı Abdüllatîf Ağa b. Mehmed ile Dua Meydânı’nda ipekçi İspirid v. Yorgi nâm zimmî şehadetleriyle bi’l-müvâcehe vech-i vecîh-i şer‘î üzere isbât etmeğin mûcebince verese-i asîl ve vasî-i mesfûrât da‘vâ-yı mezkûreleriyle mersûm diğer Yorgi zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 7 Za sene [1]241 #&#