Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 352 Hüküm no: 392 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Dilaver’in evini Hamza Çavuş Vakfı’na bey‘ bi’l-istiğlâl yoluyla sattığı Mahmiye-i İstanbul’da Sancakdar Hayreddin mahallesinde sâkine olup zâtını ma‘rifet-i şer‘iyye ile ârifân Mehmed Efendi b. el-Hâc Receb ve İbrahim b. Şaban nâm kimesneler ta‘rîfleriyle mu‘arrefe olan Fâtıma bt. Dilaver meclis-i şer‘-i şerîf-i enverde merhûm Hamza Çavuş nâm sâhibü’l-hayrın nukūd-ı mevkūfesine bi’l-fi‘l mütevellî olan işbu bâ‘isü’l-kitâb Abdullah Efendi b. Mehmed Efendi tarafından husûs-ı âti’l-beyâna vekîl olup bimâ hüve nehci’s-sübût şer‘an vekâleti sâbit olan Ahmed Efendi b. Mustafa mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrda vâki‘ bir tarafdan Hasan Beşe mülkü ve bir tarafdan mahalle-i mezbûr imâmına meşrût[a] vakıf menzili ve bir tarafdan Hüseyin mülkü ve bir tarafdan tarîk-i âm ile mahdûd bir beyt-i ulvî ve bir sofa-i ulviyye ve bir beyt-i süflâ ve bir ahır ve kenîf ve bir zîr-i zemîn ve bir su kuyusunu müştemil menzilimi bi cümleti’t-tevâbi‘ ve’l-levâhık [62b] ile vekîl-i mezbûr Ahmed Efendi’ye bi tarîki’l-istiğlâl altmış kıt‘a esedî guruşa bey‘ ve teslîm ol dahi bi’l-vekâle iştirâ ve kabûl ve teslîm eylediğinden sonra vekîl-i mezbûr Ahmed Efendi menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin dokuz guruşa bana îcâr ve teslîm ben dahi istîcâr ve tesellüm ve kabûl eyledim dedikde gıbbe’t-tasdîki’ş-şer‘î yine mahalle-i mezbûrda sâkin Ahmed Çelebi b. Mehmed nâm kimesne asl-ı mâl-ı vakf-ı mezbûr altmış guruş ile ücret-i lâzımeyi emr ve kabûlü hâvî kefâlet-i sahîha-i şer‘iyye ile kefîl olup ve kefîl-i mezbûr Ahmed Çelebi’nin dahi nefsine ve hîn-i mütâlebede meclis-i şer‘a ihzâr mahmiye-i mezbûrda Sulu Manastır mahallesinde sâkin Hürmüz v. Asvador nâm zimmî kefîl olmağın mâ hüve’l-vâki‘ bi’t-taleb ketb olundu. Fi’l-yevmi’s-sâlis min şehri Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Eyyûb Çavuş Ağa, İbrahim b. Sinan, Mehmed Efendi [b.] el-Hâc Receb, Çavuşzâde el-Muhzır ve gayruhüm.