İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 102 Hüküm no: 67 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagümrük civarında Debbâğzâde el-Hâc Hasan Mahallesi müezzini es-Seyyid Ali Molla b. es-Seyyid Salih’in mahalleden ihraç edildiği Ma‘rûz İstanbul’da Karagümrük civârında Altay Çeşmesi kurbünde Debbâğzâde el-Hâc Hasan mahallesi imâmı es-Seyyid Mehmed Efendi b. Ahmed ve Anadolu kuzâtı eşrâfından Mehmed Efendi ve el-Hâc es-Seyyid Mehmed Hamdi Efendi ve Hâce es-Seyyid Receb Efendi ve es-Seyyid Hâfız Mehmed Said Efendi ve İplikçi Hâfız Halil Efendi ve Yazıcı Hasan Efendi ve Sarrâc Süleyman Ağa ve diğer Yazıcı Hasan Efendi ve Çıkrıkçı İbrahim Ağa ve Sarrâc es-Seyyid Mehmed Ârif Ağa ve Muhallebici es-Seyyid Mehmed Tahir ve Halil ve Mücellid Ahmed Ağa ve Tesbihçi Salih Efendi ve Sarrâc Ömer Ağa ve Tütüncü İslâm Ağa ve sâirleri meclis-i şer‘-i münîrde mahalle-i mezbûre müezzini Rumeli kuzâtından es-Seyyid Ali Molla b. es-Seyyid Salih muvâcehesinde mezbûr es-Seyyid Ali Molla mahalle-i mezbûrede vukū‘ bulan akd-i enkiha ve gasl-i mevtâ hizmetinde bulunmayıp dil-âzâr ve hadîdü’l-lisân olduğundan her birimize ta‘zîri mûceb şutûm-ı galîza ile şetm ve ırzlarımızı hetk eylediğinde kendüye bi’d-defe‘ât nush-ı pend eylediğimizde mutanassıh ve mütenebbih olmayıp ef‘âl-i kabîhasında ısrâr ve bu vechile mezbûrdan râhatımız meslûb olmağla mezbûr es-Seyyid Ali Molla mutasarrıf olduğu müezzinlik cihetini âhara fâriğ olmak üzere mahalle-i mezbûreden hurûcunu her biri istid‘â eylediklerinde mezbûr es-Seyyid Ali Molla dahi üç güne değin mahalle-i mezbûreden hurûc-birle cihet-i mezkûre için münâsib kimesneyi tevkîle ta‘ahhüd ve ahâlî-i mahalle dahi bu vechile râzılar olup şikâyetlerini te’hîr eyledikleri İstanbul Mahkemesi’nden huzûr. Fî 6 Za sene [12]41