İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 102 Hüküm no: 68 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Sefer v. Hancı Kasbar’ın Şeyh Ferhad mahallesindeki evdeki hissesini Anna bt. Asvador’a devrettiği Ma‘rûz Arzuhâl eden Terzi Sefer v. Hancı Kasbar nâm zimmî bi’l-ma‘iyye rü’yete memûr nezâret-i hazret-i sadâret-penâhîde âsûde evkāf müfettişi müderrisîn-i kirâmdan Mahmûd Nidâî Efendi dâ‘îleri tarafından mürsel es-Seyyid Mehmed Esad Efendi ma‘iyyetiyle akd olunan meclis-i şer‘-i münîrde derûn-ı arzuhâlde mesfûretü’l-ism mu‘arrefetü’ş-şahs Kürkçü Oseb zimmî zevcesi Anna bt. Asvador nâm nasrâniye muvâcehesinde nezâret-i hazret-i müşârun-ileyhde âsûde evkāfdan Çadırcı Ahmed Çelebi Vakfı müsakkafâtından İstanbul’da Musallâ kurbünde Şeyh Ferhâd mahallesinde vâkı‘ ma‘lûmü’l-hudûd ve’l-müştemilât beher şehr doksan akçe icâre-i müeccelelü bir bâb menzilin altı sehm i‘tibâriyle bir sehmi bâ-temessük-i mütevellî bi’l-icâreteyn tasarrufumda iken bin iki yüz otuz senesi Ramazânü’l-mübâreğinin on üçüncü gününde dört yüz guruş bedel-i makbûz mukābelesinde bâ-ma‘rifet-i mütevellî bir sehm hisse-i şâyi‘amı mesfûre Anna nasrâniyeye kat‘iyyen ferâğ ve tefvîz ve vech-i lâyıkı üzere teslîm eylediğimde ol-dahi tefevvüz ve kabûl ve iki yüz kırk bir senesi Şa‘bânü’l-mu‘azzamının yirmi yedinci günü mesfûre Anna nasrâniye meblağ-ı merkūm dört yüz guruşu benden ahz ve hisse-i mezkûreyi yine bâ-ma‘rifet-i mütevellî bana ferâğ etmişdi lâkin mesfûre Anna nasrâniye sinîn-i mezkûrede menzil-i mezkûrda mütemekkine olduğuna binâen müddet-i mezkûre için mesfûreden yedi yüz otuz iki guruş kirâ [23b] taleb ederim deyu takrîr-i meşrûhu üzere tasaddî eylediği da‘vâsında hisse-i mezkûreyi bâ-ma‘rifet-i mütevellî mesfûre Anna nasrâniyeye re’y ile kat‘iyyen ferâğ etmişiken mersûmeden kirâ mutâlebesine şer‘an kādir olmadığı müdde‘î-i mesfûr Sefer zimmîye tefhîm ve da‘vâ-yı mezkûresiyle mersûme Anna nasrâniyeye bî-vech-i şer‘î mu‘ârazadan men‘ olunduğu huzûr. Fî 5 Z sene [1]241