İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 107 Hüküm no: 74 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Humbaracı Ocağı sipahilerinden Samakovlu Mustafa Kalfa b. Hüseyin’in, atını ekmekçi Samakovlu Ahmed Kalfa b. Mustafa’nın değirmenine emanet etmişken değirmene el konulduğu Ma‘rûz Dergâh-ı âlî dâme masûnen bi’l-avni’r-Rabbânî humbaracı ocağı sipâhîlerinden Samakovlu Mustafa Kalfa b. Hüseyin meclis-i şer‘-i münîrde e‘âzım-ı ricâl-i Devlet-i Aliyye’den hâlâ zâhire nâzırı sa‘âdetlü Mehmed Ârif Efendi bendeleri tarafından mürsel vekîli kapı çukadârı Mehmed Ağa hâzır olduğu hâlde ocağ-ı mezkûr sipâhîlerinden olup İstanbul’da Alaca Hamam kurbünde mukaddemâ habbâz olan Samakovlu Ahmed Kalfa b. Mustafa tarafından husûs-ı âtîde vekîl olduğu Mehmed Emin Kalfa b. Abdülbâkī ve İbrahim Kalfa b. Mehmed şehâdetleriyle ber-nehc-i şer‘î sâbit olan Ali Kalfa b. Mehmed muvâcehesinde benim bundan akdem bâ-irâde-i seniyye ocağ-ı mezkûra tashîh olunan eyâlet sipâhîleriyle memleketimden İstanbul’a geldiğimde malım olup işbu meclis-i şer‘de mu‘âyene olunan bir re’s kır bârgiri müvekkil-i mezbûr Ahmed Kalfa hemşehrim olmak münâsebetiyle fırın-ı mezkûrun Unkapanı dâhilinde vâkı‘ değirmeninde hıfz için müvekkil-i mezbûra îdâ‘ ve teslîm eylediğimde ol-dahi ber-vech-i muharrer istibdâ‘ ve kabz ve değirmen-i mezkûra vaz‘ edip hıfz üzere iken bu def‘a bi-tevfîkihî sübhânehû ve Teâlâ habbâz tâifesinin cânib-i mîrî ve kapan tüccârına külliyetli düyûnlarını edâda mümâtala eylediklerinden ber-mûceb-i şurût-ı nizâm-ı kadîm mâl-ı mîrî ve tüccâra mukābil olan gedikleri zabt ve füruht ve esmânıyla te’diye-i düyûn ettirilmesi husûsuna bâ-fermân-ı âlî memûr buyurulan nâzır-ı müşârun-ileyh hazretleri ma‘rifetiyle müvekkil-i merkūm Ahmed Kalfa’nın malı olmak üzere ahz murâd olunup lâkin zikr olunan bârgir vech-i müşrûh üzre benim malım olup müvekkil-i mezbûr Ahmed Kalfa’nın yedinde vedî‘at olmağla suâl olunup zikr olunan bârgiri bana teslîme müvekkil-i mezbûra izâfetle vekîl-i merkūm Ali Kalfa’ya tenbîh olunmak matlûbumdur deyu da‘vâ ettikde ol-dahi külliyen inkâr etmekle müdde‘î-i mezbûr Mustafa Kalfa ber-vech-i tafsîl müdde‘âsını her biri lede’t-tezkiyye adl ve makbûlü’ş-şehâde idükleri ihbâr olunan ocağ-ı mezkûr sipâhîlerinden ve Köstendil ahâlîsinden Hasan Kalfa b. Selîm ve Mehmed Kalfa b. Murtaza nâm kimesneler şehâdetleriyle bi’l-müvâcehe vech-i vecîh-i şer‘î üzere isbât etmeğin mûcebince zikr olunan bârgir mâliki merkūm Mustafa Kalfa’ya teslîm olunmak muktezâ-yı şer‘-i şerîf idüğü İstanbul Mahkemesi’nden huzûr. Fî 5 Z sene [12]41