İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 113 Hüküm no: 81 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütün tüccarı Cömerdoğlu Halil b. Mustafa’nın, Tütüncü Arakil v. Sergiz’e sattığı tütününün kalan parasını istediği Ma‘rûz Duhân tüccârından derûn-ı arzuhâlde mezkûrü’l-ism Cömerd oğlu Halil b. Mustafa nâm kimesne meclis-i şer‘-i münîrde sâhib-i arzuhâl Tütüncü Arakil v. Sergiz zimmî muvâcehesinde mersûm Arakil zimmî zimmetinde işbu târihden otuz beş gün mukaddem batman ta‘bîr olunur beher altı vukıyyesi dokuz guruş on paraya olmak üzere yedimden ve malımdan iştirâ ve kabz eylediği ve dört yüz yetmiş altı batman Samsun duhânı semeninden alacak hakkım olan dört bin dört yüz üç guruş on paranın ancak beş yüz guruşunu bana edâ ve teslîm etmekle bâkīsi olan üç bin dokuz yüz [26a] üç guruş on parayı dahi zimmî-i mesfûrdan hâlâ taleb ederim deyu da‘vâ ettikde ol-dahi cevâbında kaziyye minvâl-i muharrer üzere olduğunu ikrâr edip lâkin benim müdde‘î-i mezbûrdan ber-vech-i muharrer Samsun duhânı olmak üzere iştirâ ve kabz eylediğim ol-mikdâr duhân Samsun duhânından alçak olan Karaköy duhânı olmağla ol-duhânı müdde‘î-i mezbûra red murâdımdır dedikde evvelâ bu makûle duhânın cins ve vasfını teşhîse muktedir ehl-i vukūf olan tütüncü esnâfı kethüdâsı Osman Ağa b. İsmail ve vekîli es-Seyyid el-Hâc Mustafa Ağa b. Ahmed ve yiğitbaşı Ahmed Ağa b. Mustafa ve müsin ve ihtiyârlarından el-Hâc Mehmed Ağa b. Ali ve Hasan Ağa b. Ali nâm kimesnelere irâe olundukda onlar dahi ba‘de’n-nazar zikr olunan duhân Samsun duhânının a‘lâsı olduğunu her biri bi’l-müvâcehe alâ-tarîki’ş-şehâde ihbâr etmeleriyle bu sûretde zikr olunan duhânın alçak cinsinden olduğu zâhir olmayıp ol-vechile mersûm Arakil zimmînin da‘vâ-yı mezkûresinde teveccüh-i husûmet bulunmamağla kavl-i mücerrediyle red da‘vâsına kādir olmadığı kendüye ba‘de’t-tefhîm sâlifü’l-beyân ikrâr ve i‘tirâfıyla lâzım gelen meblağ-ı bâkī-i merkūm üç bin dokuz yüz üç guruş on parayı bi’t-taleb müdde‘î-i mezbûra edâ ve teslîme mersûm Arakil zimmîye tenbîh olunduğu İstanbul Mahkemesi’nden huzûr. Fî 16 Z sene [12]41