İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 114 Hüküm no: 82 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariko bt. Françesko’nun Galata’da Perşembe Pazarı’ndaki evinin kiracısı İngiliz Magri Mikelli’de alacağı olduğu 2690 guruş ve 7730 guruş def‘ ve teslîmi iktizâ eylediği Ma‘rûz Mübârek rikâb-ı kamer-tâb-ı hazret-i hilâfet-penâhîye takdîm-i arzuhâl eden şahsı mu‘arrefe Mariko bt. Françesko nâm nasrâniye evvelâ Çarşamba günü arz odasında huzûr-ı fâizü’n-nûr-ı vekâlet-penâhîlerinde bi’l-ma‘iyye istimâ‘a memûr nezâret-i hazret-i fetvâ-penâhîde âsûde evkāf müfettişi müderrisîn-i kirâmdan fazîletlü Mehmed Ârif Efendi ve ba‘dehû dâ‘îhânelerinde müfettiş-i mûmâ-ileyh tarafından mürsel mevlânâ es-Seyyid Mehmed Esad Efendi dâ‘îleriyle akd olunan meclis-i şer‘-i münîrde İngilterelü Magri Mikelli v. Francisko nâm müste’men muvâcehesinde mersûme Mariko nasrâniyenin zevci Françelü Yakomi v. Andon ve Françelü Pirolli v. Covanni ve ‘ınânen şerîki Covani Dalço v. Andon nâm müste’menler ile tercümânı Patos hâzır oldukları hâlde nezâret-i hazret-i müşârun-ileyhde âsûde evkāfdan merhûme Fâtıma Hatun Vakfı müstağallâtından mahrûse-i Galata’da Perşembe Pazarı nâm mahalde kâin bâ-temessük-i mütevellî bi’l-icâreteyn müstakilleten mutasarrıfe olduğu ma‘lûmü’l-hudûd ve’l-müştemilât bir bâb menzilimi sene-i rumiyenin bin sekiz yüz yirmi üç senesi kânûn-i evveli ibtidâsından beher şehr yüz elli dokuzar guruş kirâ kavliyle mersûm Margiri [Magri] Mikelli müste’mene îcâr ve teslîm eylediğimde ol-dahi istîcâr ve tesellüm etmekle kirâ-yı mezkûrdan yirmi yedi ay müddetde zimmetinde bâkī kalan iki bin altı yüz doksan guruşu hâlâ mersûm Magri Mikelli’den taleb ederim deyu da‘vâ ettikde mersûm Magri Mikelli dahi cevâbında kaziyye minvâl-i muharrer üzere olup menzil-i mezkûru müdde‘iye-i mersûme Mariko nasrâniyeden ol-mikdâr kirâ kavliyle müşâhereten istîcâr ve müddet-i merkūmede derûnunda temekkün eylediğini ikrâr ve i‘tirâf edip lâkin müdde‘iye-i mezbûre Mariko nasrâniye ile zevci hâzır-ı mersûm Yakomi sene-i rumiyenin bin sekiz yüz yirmi dördüncü senesi haziranının sekizinci günü hâzırân-ı mesfûrân Pirolli ve Covani Dalço müste’menlerin mallarından ve yedlerinden her biri âharın zimmetine lâzım gelen meblağa kefîl ve zâmin olarak bi’l-ma‘iyye bâ-temessük yedi bin yedi yüz otuz guruş karz aldıklarından sonra ben menzil-i mezkûru müdde‘iye-i mersûme Mariko nasrâniyeden hâzır-ı mesfûr Covani Dalço müste’men vâsıtasıyla istîcâr eylediğime binâen kirâ-i mezkûrdan zimmetimde bâkī kalan iki bin altı yüz doksan guruşu şerîkân-ı mersûmânın mersûme Mariko nasrâniye zimmetinde asâlet ve kefâletine binâen alacak hakları olan meblağ-ı merkūm yedi bin yedi yüz otuz guruşun ol-mikdârına mahsûben mersûme Mariko nasrâniyenin emriyle mersûm Covani Dalço müste’mene def‘ ve teslîm etmişdim deyu hâzırân-ı mersûmânın tasdîkleriyle ma‘an eyledikleri kelâmlarında mersûme Mariko nasrâniye istintâk olundukda cevâbında meblağ-ı merkūm yedi bin yedi yüz otuz guruşu hâzırân-ı mersûmândan yalnız zevcim hâzır-ı mersûm Yakomi müstakillen karz alıp el-yevm zimmetinde deynidir deyu zevci hâzır-ı mesfûr ile ma‘an takrîr edip kendinin gerek [26b] iktirâzını ve gerek kefâletini ve gerek emrini külliyen inkâr etmeğin evvelâ mersûmân Pirolli ve Covani Dalço müste’menler ber-vech-i muharrer müdde‘âlarını isbâta kādir olamayıp talebleriyle mesfûre Mariko nasrâniyeye bi’l-müvâcehe vech-i şer‘î üzere yemîn verilmeğin mûcebince mersûmân Pirolli ve Covani Dalço müste’menler da‘vâ-yı mezkûreleriyle mersûme Mariko nasrâniyeye bilâ-beyyine mu‘ârazadan men‘ olunmağın bu sûretde muktezâ-yı şerî‘at-ı mutahhara üzere mersûmân Pirolli ve Covani Dalço’nun mesfûre Mariko nasrâniye zimmetinde asâleten ve kefâleten bir gûne hakk-ı şer‘îleri ve husûs-ı mezkûra emri sâbit olmamış iken mersûm Magri Mikelli’nin mersûme Mariko nasrâniyeye olan deyn-i mezkûrunu mersûm Covani Dalço’ya teslîmle zimmeti ber’iye olmayıp deynine mahsûb olmak zu‘muyla bi-gayrı hakkın almış olduğu meblağı mersûm Covani Dalço’dan istirdâd ve kirâ-yı mezkûrdan zimmetinde bâkī kalan meblağ-ı merkūm iki bin altı yüz doksan guruşu mesfûre Mariko nasrâniyeye edâsı lâzım geldiği mesfûr Magri Mikelli’ye ve müstakillen karz almadığını mukırr ve mu‘terif olduğu meblağ-ı merkūm yedi bin yedi yüz otuz guruşunu dahi mesfûrûn Pirolli ve Covani Dalço’ya def‘ ve teslîm iktizâ eylediği mersûm Yakomi’ye başka başka tefhîm olunduğu İstanbul Mahkemesi’nden huzûr. Fî 16 Z sene [1]241