İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 116 Hüküm no: 83 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ahmed Kadı Bey’in Larende’deki vakıf tevliyetinin ibkası talebi Ma‘rûz Sâdır olan fermân-ı âlîlerine imtisâlen işbu arzuhâle merbût târih-i i‘lâm senesi Zilka‘detü’ş-şerîfesinin yirmi birinci günü târihiyle müverraha ve hâlâ medîne-i Larende nâibi es-Seyyid el-Hâc Mehmed Memiş Efendi dâ‘îlerinin imzâsıyla mümzât ve mutâbık mührüyle mahtûm bir kıt‘a vakfiyeye nazar ve mine’l-matla‘ ile’l-makta‘ mütâla‘a olundukda medîne-i mezbûrede mülk arsa üzerine inşâ olunan yedi aded hücre ve bir dershâne ve bir mescid-i şerîfi müştemil bir kıt‘a medrese vakfından ibâret olup mazmûnu şer‘-i şerîfe mutâbık ve sebk ü serdi kāide-i fenn-i sakke muvâfık ve kayd ve ihticâca sâlih ve lâyık olmağla vakfiye-i mezkûre ber-vech-i istid‘â Anadolu Muhasebesi’ne kayd ile yedine ibkā ve tevliyeti’çün dahi şurûtu derciyle yedine bir kıt‘a berât-ı âlî-şân sadaka ve ihsân buyurulmasını vakf-ı mezbûrun vâkıfı ve bi’l-meşrûta mütevellîsi sâhib-i arzuhâl Mendesetli?-zâde es-Seyyid Ahmed Kadı Bey kulları istid‘â eylediği İstanbul Mahkemesi’nden huzûr-ı âlîlerine i‘lâm olundu bâkī emr u fermân hazret-i veliyyü’l-emrindir. Fî 21 Z sene [1]241