İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 116 Hüküm no: 84 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalbur Mehmed Said Ağa b. İbrahim’in vefat etmesi ile Değirmen Hanı’ndaki gediğinin hanımı ve kızlarına miras kaldığı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda sadr-ı esbak merhûm Ragıb Paşa evkāfından İstanbul hısnı ebvâbından Balıkpazarı Kapısı dâhilinde Birgoslu Ali Paşa mahallesinde kâin Değirmen Hânı demekle arîf bir bâb hânın tabaka-i ulyâsında cânib-i yemîninde vâkı‘ beşinci ta‘bîr olunur fevkānî bir bâb oda ile hizâsında olan peykenin gedikleri ta‘bîr olunan âlât-ı ma‘lûmeye bâ-sûret mâlik olan na‘lbûr Mehmed Said Ağa b. İbrahim bundan akdem fevt olup verâseti zevce-i menkûha-i metrûkesi Şerife Emine Hatun bt. es-Seyyid Mehmed ile sulbiye sagīre kızları Şerife Hatice ve sâhibe-i arzuhâl Şerife Emine Âliye’ye ba‘de’l-inhisâr meclis-i şer‘-i şerîfde ibrâz ve kırâat olunan defter-i kassâm-ı askerî mantûkunca zevce-i mezbûre ile sagīre-i merkūme Şerife Hatice’nin hisse-i irsiyeleri sûret-i şer‘-i şerîfe tatbîkan sagīre-i mezbûre Şerife Emine Âliye için iştirâ olunmuş ve ol-vechile mecmû‘u irsen ve şirâen sagīre-i mezbûre Şerife Emine Âliye’nin mülk-i mahzı ve hakk-ı sarfı olmuş olduğundan bahisle zikr olunan oda ve peyke gediklerinin kaleminde müteveffâ-yı mezbûr Mehmed Said Ağa ismine olan kaydı ref‘ ve terkīn ve mezbûre Emine Âliye ismine tashîhan kayd ile yedine sûret i‘tâsını sagīre-i mezbûrenin bâ-hüccet-i şer‘iyye vasî-i mansûbu el-Hâc İsmail Ağa b. Ali bi’l-vesâya istid‘â ve keyfiyyet-i hâl bast olunan minvâl-i muharrer üzere olduğunu vukūf-ı tâmları olan Bezzâzistânî Ömer Ağa b. Mehmed ve diğer Ömer Ağa b. Mehmed nâm kimesneler meclis-i şer‘-i şerîfde alâ-tarîki’ş-şehâde ihbâr ve inhâ etmeleriyle bu sûretde derkenârda muharrer şurûtu mûcebince atîk sûreti müteveffâ-yı mezbûr yedinden zayi‘ olmuş olduğuna binâen yed-i âharda zuhûr eder ise amel ve i‘tibâr olunmamak üzere gerek mezbûr ve gerek müteveffâ-yı mezbûr Mehmed Said Ağa ismine olan kaydı ref‘ ve terkīn ve mezbûre Şerife Emine Âliye ismine tashîhan kayd ile yedine sûret i‘tâsı muktezâ-yı maslahatdan idüğü İstanbul Mahkemesi’nden huzûr. Fî 22 Zilhicce sene [12]41