İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 117 Hüküm no: 85 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İsmail’in, Hanife bt. Ahmed’den muhâla‘a yoluyla boşandığı Ma‘rûz Sâhib-i arzuhâl Tosyalı a‘mâ Mustafa b. İsmail nâm kimesne meclis-i şer‘-i münîrde derûn-ı arzuhâlde mezkûretü’l-ism mu‘arrefetü’z-zât Hanîfe bt. Ahmed nâm hatun mahzarında mezbûre Hanîfe Hatun işbu târihden sekiz ay mukaddem yirmi bir guruş mehr-i müeccel tesmiyesiyle şuhûd mahzarında nefsini bana tezvîc ettikde ben dahi tezevvüc ve duhûl eylediğimden sonra bu esnâda beni menzilinden tard ve mutâva‘attan imtinâ‘ etmekle mutâva‘atına tenbîh olunmak matlûbumdur deyu da‘vâ ettikde ol-dahi cevâbında müdde‘î-i mezbûr Mustafa ol-mikdâr guruş mehr-i müeccel tesmiyesiyle zevc-i dâhilim olup lâkin işbu târih-i i‘lâm senesi Şevvalü’l-mükerreminin yirminci günü İstanbul’da Sedefciler kurbünde Emin Sinan Mahallesi’nde huzûr-ı müslimînde ben mehr-i müeccelim olan yirmi bir guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere merkūm Mustafa ile muhâla‘a-i sahîha-i şer‘iyye ile hul‘ olduğumda ol-dahi hul‘-i mezkûru kabûl ve hukūk-ı zevciyyete müte‘allıka âmme-i da‘vâdan her birimiz âharın zimmetini kabûlü hâvî ibrâ edip ol-vechile ben târih-i merkūmda mezbûr Mustafa’dan bâyinen mutallaka olmuşdum deyu ba‘de’d-def‘ ve’l-inkâr dâfi‘a-i mezbûre ber-vech-i muharrer eylediği müdde‘âsını lede’t-tezkiyye makbûlü’ş-şehâde idükleri ihbâr olunan mahalle-i mezbûre ahâlîsinden es-Seyyid Mehmed Beşe b. Süleyman ve Pabuççu es-Seyyid Mustafa b. Halil nâm kimesneler şehâdetleriyle ber-nehc-i şer‘î bi’l-müvâcehe isbât etmeğin mûcebiyle mezbûr Mustafa zevciyyet da‘vâsıyla mezbûre Hanîfe Hatun’a bî-vech mu‘ârazadan men‘ olunduğu İstanbul Mahkemesi’nden huzûr. Fî 20 Zilhicce sene [12]41