Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 353 Hüküm no: 394 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müstakim bt. Abdullah’ın evini Ahmed Efendi b. İlyas’a sattığı Mahmiye-i İstanbul’da Mi‘mâr Sinan mahallesinde sâkine olup Ali Beşe b. Abdullah’ın mu‘takası olan Müstakīm bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hüseyin Beşe b. Hasan ve Mustafa Beşe b. Sefer şehâdetleriyle şer‘an sâbit olan Mehmed Çelebi b. Sefer meclis-i şer‘-i hatîrde işbu bâ‘isü’l-vesîka fi’l-kazâ Ahmed Efendi b. İlyas mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkilem mezkûre Müstakīm’in yedimde mülkü olup mahalle-i mezbûrda vâki‘ bir tarafı el-Hâc Hüseyin b. Abdülmennân mülküne ve bir tarafı Muharrem Efendi’ye meşrûta menzile ve bir tarafı Fâtıma bt. Ramazan mülküne ve bir tarafı tarîk-i hâssa müntehî fevkānî iki bâb oda ve bir sofa ve tahtânî bir bâb oda ve bi’r-i mâ ve havluyu müştemil mülk menzilini, bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile merkūm Ahmed Efendi’ye yirmi sekiz bin akçeye bey‘ ve teslîm ol dahi iştirâ ve kabûl ve tesellüm eyledikden sonra semeni olan meblağ-ı mezbûr yirmi sekiz bin akçeyi yedinden tamâmen kabz ve tesellüm eyledi ba‘de’l-yevm menzil-i mahdûd-ı mezkûr mezbûr Ahmed Efendi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve tis‘în ve elf. [63a] Şuhûdü’l-hâl: Mehmed Efendi b. Abdurrahman, Ahmed Halîfe b. Receb.