İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 125 Hüküm no: 96 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kanbur Hanı’ndaki on adet odayı kilitleyip memleketlerine giden kiracıların, odalarının açıldığı Ma‘rûz İstanbul’da Kantârcılar içinde vâkı‘ Kanbur Hânı demekle ma‘rûf bir bâb hânın müste’cirlerinden olup bundan akdem vilâyetlerine mürûrlarına irâde-i seniyye ta‘alluk etmiş olmağla ol-vechile hân-ı mezkûrun on bâb odalarında sâkinler olup mukaffelen terk ve ta‘tîl-birle vilâyetlerine giden on nefer kesânın odalarını ma‘rifet-i şer‘le feth ve küşâd ve derûnlarında mevcûd mütesâri‘u’l-fesâd olan eşyâları tahrîr ve semen-i misilleriyle âhara bey‘ olunup esmânı müste’cirden mezbûrûnun taraflarından vekîl-i müsbetleri zuhûruna değin kayyim nasbıyla bezzâzistâna vaz‘ ve oda-i mezkûreler kendülere teslîm olunmasını hân-ı mezkûrun mutasarrıfları olan hâcegân-ı dîvân-ı hümâyûndan Teşrîfâtî-i sâbık Ahmed Reşîd Efendi merhûmun evlâdından sagīre Zübeyde ve Âişe Hanımların ammeleri ve vasî-i mansûbeleri Fâtıma Hanım bt. Ömer ve sagīre Fâtıma Hanım’ın kezâlik vasî-i mansûbesi Necîbe Hanım bt. Abdullah ve sagīr Kemâleddin Bey ile Sâre Hanım’ın vasî-i mansûbeleri Hatice Hanım bt. Abdullah taraflarından vekîl-i şer‘îleri Hasan Ağa b. Mehmed iltimâs etmekle sâdır olan fermân-ı âlîlerine imtisâlen kıbel-i şer‘den meb‘ûs kâtib Mehmed Hidâyetullah Efendi dâ‘îleri ma‘an mürsel ümenâ-i şer‘le sâir cerîdede mazbûtu’l-esâmî kimesneler hâzır oldukları hâlde hân-ı mezkûra varıp oda-i mezkûrelerin [29b] kufullerini feth ve küşâd ve derûnlarında mevcûd mütesâri‘u’l-fesâd olan eşyalarını tahrîr ve semen-i misilleriyle âhara bey‘ ve esmânı müste’cirûn-ı mezbûrûnun taraflarından vekîl-i müsbetleri zuhûruna değin kıbel-i şer‘den kayyim nasb olunan hân-ı mezkûrun odabaşısı Dimitri v. Nikola zimmî ma‘rifetiyle mümzâ ve mahtûm bir kıt‘a defteriyle ma‘an kutu derûnuna mevzû‘an ve memhûren bezzâzistân-ı atîka vaz‘ olunduğu İstanbul Mahkemesi’nden huzûr. Fî 18 Z sene [1]241