İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 129 Hüküm no: 100 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yagop v. Karabet’in, Osman b. Abdullah’tan 300 kuruş borç alan Manok v. Karabet’e kefil olduğu Ma‘rûz Âsitâne-i aliyyede vâkı‘ berber esnâfından Yagop v. Karabet zimmî meclis-i şer‘-i münîrde derûn-ı arzuhâlde mezkûrü’l-ism Saraydâr? Manok v. Karabet zimmî muvâcehesinde ben bundan akdem mersûmdan karz aldığım yüz guruşu edâ eyledikden sonra mersûmun İstavros Hamâmı dest-gâhdârı gāib ani’l-meclis Osman b. Abdullah nâm kimesneye zimmetinde karzından deyni olan üç yüz guruşa emriyle kefîl ve zâmin olup ba‘dehû gāib-i mezbûr Osman meblağ-ı mezkûru benden da‘vâ ve on sekiz guruşunu tenzîl ile mâ‘adâ iki yüz seksen iki guruşunu bi-hükmi’l-kefâle ahz etmekle ben dahi bi’l-mürâca‘a mesfûrun zimmetinde hakkım olan meblağ-ı mezkûr iki yüz seksen iki guruşun sekiz guruşunu dahi kendi yedinden ahz ve istîfâ edip bâkīsi olan iki yüz yetmiş dört guruşu mersûm Manok zimmîden mürâca‘aten taleb ve da‘vâ eylediğimde ol-dahi ikrâr ve tasdîk ve yüz yetmiş dört guruşunu hâlen ve yüz guruşunu dahi târih-i i‘lâmdan altmış bir gün tamâmında bana edâ ve teslîme ta‘ahhüd ile istimhâl eylediğinde ben dahi bu vechile râzı olup meblağ-ı merkūm yüz guruşu vech-i meşrûh üzere imhâl ve te’hîr eyledim deyu mukırr-ı mersûm Yagop zimmînin cemî‘-i takrîr-i meşrûhunu mesfûr Manok zimmî tasdîk ve meblağ-ı merkūm iki yüz yetmiş dört guruş zimmetinde mersûm Yagop zimmîye ber-vech-i muharrer mürâca‘aten deyni olduğunu ikrâr ve i‘tirâf ve minvâl-i meşrûh üzere yüz yetmiş dört guruşunu hâlâ ve bâkī yüz guruşunu dahi altmış bir gün hitâmında edâya ta‘ahhüd edip ol-vechile kat‘-ı nizâ‘ eyledikleri İstanbul Mahkemesi’nden huzûr. Fî 5 Z sene [12]41