İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 129 Hüküm no: 101 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedikpaşa’daki berber dükkânının gedik senedini kaybeden Ârif Usta b. es-Seyyid el-Hâc Halil’in, yeniden gedik senedi talep ettiği Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Gedikpaşa civârında Tatlıkapı karşısında vâkı‘ baş muhâsebede kendi ismine mukayyed bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müddet-i vâfireden beri müstakillen malı olup ancak yedinde olan gedik senedi kazâen zâyi‘ olduğundan bahisle kaydı mûcebince kaleminden yedine müceddeden sûret i‘tâsını sâhib-i arzuhâl es-Seyyid Mehmed Ârif Usta b. es-Seyyid el-Hâc Halil nâm kimesne istid‘â eylediği mefhûm-ı arzuhâlden ve fi’l-hakīka dükkân-ı mezkûr gediği sâhib-i arzuhâl-i merkūmun ismine tashîhan baş muhâsebede mukayyed defter-i müfredâta dâhil idüğü derkenârdan müstebân ve gedik-i mezbûr mukayyed ve mu‘teber ve taht-ı nizâma dâhil kadîm gediklerinden olarak müddet-i vâfireden beri sâhib-i arzuhâl-i mezbûrun müstakillen malı olup derkenâr olunan gedik işbu gedik ve mâliki dahi işbu mezbûr Ârif Usta olduğunu bu makūle mukayyed ve mu‘teber kadîm gediklerin kaydı mûcebince ashâbı yedlerine sûret i‘tâsı bâ-fermân-ı âlî mer‘î ve düstûru’l-amel tutulan şurût-ı nizâmlarından ve mesbûk-ı bi’l-emsâl idüğünü esnâf-ı merkūme kethüdâsı İbrahim Ağa ve şeyhi el-Hâc Musa Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Mustafa Ağa ve köşe ustası Selim Usta ve sâir bi’l-cümle lonca ihtiyârları meclis-i şer‘-i şerîfde mezbûr es-Seyyid Mehmed Ârif Usta hâzır olduğu hâlde her biri alâ-tarîki’ş-şehâde ihbârlarıyla zâhir ve nümâyân olmağın bu sûretde sâhib-i arzuhâl-i mezbûr es-Seyyid Mehmed Ârif Usta kullarının istid‘âsı vâkı‘a mutâbık ve şurût-ı nizâm-ı mer‘iyyeye muvâfık olduğundan müsâ‘ade-i seniyyeleri erzânî buyurulup kaydı mûcebince kaleminden yedine müceddeden sûret i‘tâsı bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 24 Z sene [12]41