İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 132 Hüküm no: 104 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamlıca suyu satan esnafın, kendilerine es-Seyyid Mehmed Ağa’nın kethüda nasbedilmesini talep ettikleri Çamlıca suyu esnâfına kethüdâ nasbı Ma‘rûz Âsitâne-i aliyyede vâkı‘ Çamlıca suyu bey‘iyle me’lûf sucu esnâfının yiğitbaşısı Kalpakçılarbaşılı es-Seyyid Mehmed Ağa ve ihtiyârlarından Göbektaşılı İbrahim Ağa ve Yenikapılı Abdurrahman Ağa ve Hasır İskeleli es-Seyyid Mustafa Ağa ve Okçularbaşılı es-Seyyid Salih Ağa ve Hocapaşalı Hüseyin ve Ketencilerli Osman ve Sultan Bâyezidli el-Hâc Mahmud Ağa ve Pazarlı İsmail Ağa ve sâirleri dâ‘îhânelerinde ma‘kūd meclis-i şer‘-i âlîde kudemâlarından es-Seyyid Mehmed Ağa b. el-Hâc Abdurrahman muvâcehesinde mezbûr es-Seyyid Mehmed Ağa kudemâmızdan olup bu âna kadar dahi umûrumuzu idâre edegelmekle kıbel-i şer‘-i şerîfden üzerimize kethüdâ nasb ve ta‘yîn olunması niyâzımızdır deyu istid‘â ve fi’l-vâkı‘ esnâf-ı merkūme umûrlarını idâre edecek bir kimesneye muhtâc oldukları zâhir ve hüveydâ olmağla ber-vech-i istid‘â merkūm es-Seyyid Mehmed Ağa kıbel-i şer‘-i şerîfden esnâf-ı merkūme üzerlerine kethüdâ nasb ve ta‘yîn ve umûr-ı esnâfı şer‘-i şerîf ve kānûn-ı münîfe tatbîkan idâre ve rü’yet ve hilâf-ı şer‘-i kadîm ve mugāyir-i kānûn-ı kadîm bir kimesneyi bi-gayrı hakkın tekdîr ve tecrîm ve ta‘zîb ve tağrîm etmekden gāyetü’l-gāye hazer ve tebâ‘üdüne tenbîh olunduğu ma‘lûm-ı ilm-i âlem-ârâları buyuruldukda ol-bâbda ve her hâlde emr u fermân hazret-i veliyyü’l-emrindir. Fî 28 Z sene [1]241