İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 133 Hüküm no: 106 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. Mehmed’in Hristo v. Niko’da alacağı olduğu Kasab tâifesinden Hristo v. Niko zimmî meclis-i şer‘-i münîrde tâife-i merkūmeden Konyalı Mustafa Çavuş b. Mehmed nâm kimesne muvâcehesinde işbu arzuhâle merbût târih-i i‘lâm senesi Cumâdelûlâsı’nın yirmi ikinci günü târihiyle müverrah ve sâbıkā mahrûse-i Galata kādısı Sıdkīzâde fazîletlü Mehmed Rif‘at Efendi’nin hatmiyle mahtûm bir kıt‘a i‘lâm-ı şer‘île tafsîl ve beyân olunduğu üzere mezbûr Mustafa Çavuş târih-i mezkûrda beni kādı-i mûmâ-ileyh huzûruna ihzâr ile bundan akdem mahrûse-i mezbûrede Karaköy Kapısı dâhilinde vâkı‘ gediğine mâlik olduğum kasab dükkânımda mersûm Hristo zimmî kanadâr ta‘bîr olunur bir buçuk sene müddet beyyâ‘ım olmağla müddet-i mezkûrede malımdan âhara bey‘ eylediğim lahm-ı ganemin esmânından makbûzu olan mebâliğin hesâbını mersûm Hristo zimmî ile şehr-i mezbûrun on birinci günü sehv ve galatdan ârî hesâb-ı sahîh ile yegân yegân rü’yet eylediğimizde benim mezbûr Hristo zimmetinde bin yüz seksen iki guruş alacak hakkım zuhûr ettikden sonra meblağ-ı mezkûru bana vermeyip fuzûlî kendi umûruna sarfla istihlâk etmekle zimmetinde zamânen bana deyni olduğunu ikrâr ve yedime bir kıt‘a temessük dahi vermişdi deyu inkârıma mukārin tasaddî eylediği da‘vâsından kat‘an li’n-nizâ‘ ve ref‘an li’l-husûme yedi yüz guruşa benimle sulh olduğunda ben dahi sulh-i mezkûru kabul etmemle bedel-i sulh-i mezkûrdan mâ‘adâ ziyâde müdde‘âsına ve bi’l-cümle husûs-ı mezkûra ve sâir cemî‘-i hukūk-ı şer‘iyyeye müte‘allıka âmme-i de‘âvî ve kâffe-i mutâlebâtdan tarafeynden her birimiz âharın [32a] zimmetini ibrâ-i âmm-i sahîh-i şer‘î ile ibrâ ve ıskāt ve her birimiz ber-minvâl-i muharrer âharın ibrâsını kabûl eylediğimizden sonra ibrâdan müstesnâ bedel-i sulh mezkûr yedi yüz guruşun bi’t-taleb mezbûr Mustafa Çavuş’a edâsıyla kādı-i mûmâ-ileyh beni ilzâm ve keyfiyyeti huzûr-ı âlîye i‘lâm etmekle i‘lâmı mûcebince meblağ-ı merkūm benden tahsîl ve merkūm Mustafa Çavuş’a teslîm olunmuşdu lâkin ben sulh-i mezkûruma nâdim ve peşîmân olmamla öyle olıcak hesâbımız tekrâr görülüp zimmetinde alacağım zuhûr eder ise alıverilmek matlûbumdur deyu takrîr-i meşrûhu üzere mazmûn-ı i‘lâm-ı mezkûru ve ibrâ-i âm ile ibrâ eylediğini mu‘terif iken tasaddî eylediği da‘vâsı şer‘an mesmû‘a olmadığı müdde‘î-i mesfûr Hristo zimmîye tefhîm ve da‘vâ-yı mezkûresiyle merkūm Konyalı Mustafa Çavuş’a bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 18 min Z sene [1]241