İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 134 Hüküm no: 107 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Ağa b. Hüseyin’in uncu değirmenindeki hissesini, Mehmed Atâullâh Efendi’ye devrettiği Üsküdar’da değirmen nizâ‘ı Ma‘rûz Zikr-i âtî değirmen gediğinin nısfına bâ-sûret mâlik olan el-Hâc Mehmed Ağa b. Hüseyin tarafından husûs-ı âtîde vekîl olduğu Halil Ağa b. Mustafa ve Ahmed Ağa b. Hüseyin şehâdetleriyle ber-nehc-i şer‘î sâbit olan Mustafa Ağa b. Yusuf meclis-i şer‘-i münîrde gedik-i mezkûrun nısf-ı âharına bâ-sûret mâlik olan Mehmed Atâullâh Efendi b. el-Hâc Abdullah tarafından ber-vech-i âtî tasdîka vekîl-i şer‘îsi İsmail Ağa b. Mehmed muvâcehesinde habbâzân kethüdâsı Mehmed Ağa ve nizâm ustaları hâzır oldukları halde bi’l-vekâle takrîr-i kelâm edip medîne-i Üsküdar’da Ayazma İskelesi’nde kâin üç horoslu bir bâb uncu değirmeni derûnunda mevcûde gedik ta‘bîr olunur on iki re’s bârgir ve sâir âlât-ı lâzıme-i ma‘lûmeyi mutasarrıf-ı sâbıklarının cânib-i mîrîye deynleri olan dört bin beş yüz seksen altı buçuk guruşun bin beş yüz seksen altı buçuk guruşunu ber-vech-i peşîn ve mâ‘adâ üç bin guruşunu dahi senede beşer yüz guruş vererek mukassatan edâ etmek üzere ber-mûceb-i şurût-ı nizâm kıbel-i şer‘den nasb olunan vasî yedinden sûret-i şer‘îsine tatbîkan müvekkilân-ı mezbûrân Mehmed Atâullâh Efendi ve el-Hâc Mehmed Emin Ağa bi’l-münâsafa iştirâ ve tesellüm ve isimlerine tashîhan yedlerine kaleminden başka başka sûret ahz etmişler idi el-hâletü hâzihî ben müvekkilim merkūm el-Hâc Mehmed Emin Ağa’nın mâlik olduğu nısf hisse-i mezkûresini tarafeynden bi’l-îcâb ve’l-kabûl bâtten ve sahîhan bi-safka-i vâhide iki bin iki yüz doksan üç guruş on paraya müvekkil-i mezbûr Mehmed Atâullâh Efendi’ye bi’l-vekâle bey‘ ve temlîk ve vech-i lâyıkı üzere teslîm eylediğimde ol-dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semen-i mezkûrdan mukaddemâ hîn-i iştirâlarında peşînen edâsı lâzım gelen meblağ-ı merkūm bin beş yüz seksen altı buçuk guruşu müvekkilim mezbûr el-Hâc Mehmed Emin Ağa’nın hissesinde bi-şarti’r-rucû‘ emriyle merkūm Mehmed Atâullâh Efendi kendi malından zahîre hazînesine edâ etmiş olmağla ol-vechile mezbûr Mehmed Atâullâh Efendi’nin müvekkilim mezbûr zimmetinde bi’l-mürâca‘a alacağı olan yedi yüz doksan üç guruş on paraya semen-i mezkûr iki bin iki yüz doksan üç guruş on paranın yedi yüz doksan üç guruş on parasını bi’t-terâzî takās ve mahsûb ve bâkī bin beş yüz guruşunu dahi müvekkilim mezbûrun cânib-i mîrîye mukassatan deyni olan ol-mikdâr guruşa takāsan kabzına memûra edâ ve teslîm etmek üzere ihâle eylediğimde ol-dahi mukāsa ve kabûl etmekle fî-mâ ba‘d müvekkilim mezbûr el-Hâc Mehmed Emin Ağa’nın merkūm Mehmed Atâullâh Efendi zimmetinde semen-i mezkûrdan bir nesne bâkī hakkı ve âlât-ı gedik-i mezkûrda dahi kat‘an alâka ve medhali kalmayıp nısfı mukaddemâ ve nısfı dahi hâlâ ki mecmû‘u müstakillen merkūm Mehmed Atâullâh Efendi’nin mülk-i mahzı ve hakk-ı sarfı olmağın mebî‘-i mezkûrun tağrîr ve gabnine ve semen-i mezkûra ve bi’l-cümle gedik-i mezkûr husûsuna müte‘allıka da‘vâdan merkūm Mehmed Atâullâh Efendi’nin zimmetini bi’l-vekâle kabûlü hâvî ibrâ ve ıskāt dahi eyledim deyu ba‘ de’l-ikrâr ve’t-tasdîk nısf-ı gedik-i mezkûrun merkūm el-Hâc Mehmed Emin Ağa ismine olan kaydı kaleminden ref‘ ve terkīn ve mecmû‘u müstakillen merkūm Mehmed Atâullâh Efendi ismine sebt ve kayd-birle tarafeyn yedlerinde olan sûretler ahz ve kaleminde battâlda hıfz ile mecmû‘u müstakillen mezbûr Mehmed Atâullâh Efendi’nin ismine tashîhan zabtı’çün kaleminden [32b] yedine müceddeden bir kıt‘a sûret i‘tâsını istid‘â ve istid‘âları şurût-ı nizâma muvâfık olduğunu esnâf-ı hâzirûn-ı merkūmûn dahi ihbâr ve inhâ etmeleriyle bu sûretde ber-mûceb-i şurût-ı nizâm istid‘âlarına müsâ‘ade-i seniyyeleri erzânî buyurulup gedik-i mezkûrun mecmû‘u müstakillen merkūm Mehmed Atâullâh Efendi ismine tashîhan kayd ile yedine bir kıt‘a sûret i‘tâsı iktizâ eylediği İstanbul Mahkemesi’nden huzûr. Fî 24 Z sene [12]41