İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 135 Hüküm no: 108 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Eğinli Bogos v. Agop’un mirasçılarının tütüncü dükkânını Tütüncü Agop v. Minas’a devrettikleri Ma‘rûz Âsitâne-i aliyyede vâkı‘ tütüncü esnâfından olup vatan-ı asliyesi olan Anadolu’da Eğin kasabasında mütemekkin iken işbu târihden yirmi ay mukaddem hâlik olan Bogos v. Agop zimmînin verâseti kasaba-i mezbûrede mütemekkinler zevce-i metrûkesi Oskopi bt. Nikogos ve anası Sara bt. Asvador ve li-ebeveyn kız karındaşı Nazlı nasrâniyelere münhasıra ve tashîh-i mes’ele-i mîrâsları bi-hükmi’l-avn on üç sehmden olup sihâm-ı mezbûreden üç sehmi zevce-i mersûmeye dört sehmi ümm-i mersûmeye ve altı sehmi dahi uht-i mersûmeye isâbeti lede’ş-şer‘i’l-enver zâhir ve mütehakkik oldukdan sonra verese-i mesfûrât Oskopi ve Sare ve Nazlı nasrâniyeler taraflarından zikri [zikr-i] âtî gedik âlâtını bey‘e ve semenini kabz ve ibrâya ve makbûzunu kendülere irsâl ve îsâle kabûlüne mevkūfe vekîlleri olup haber-i vekâlet kendüye vâsıl olıcak kabûl eylediği kasaba-i mezbûre re‘âyâsından bu esnâda Der-aliyye’ye gelen şahıslarını bilir Tütüncü Nikogos v. Abraham ve Sarrâf Araboğlu Ohan v. Sergiz nâm zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan İstanbul’da Yeni Hân sarrâflarından Abram v. Bogos zimmî meclis-i şer‘-i münîrde Tütüncü Agop v. Minas zimmî muvâcehesinde esnâf-ı merkūme kethüdâsı Osman Ağa ve vekîli el-Hâc Mustafa Ağa ve Yiğitbaşısı Molla Ahmed ve bi’l-cümle lonca ihtiyârları hâzır oldukları hâlde bi’l-vekâle takrîr-i kelâm edip İstanbul’da Sultân Bâyezid-i Velî Hân Hazretleri Câmi‘-i Şerîfi kurbünde Testereciler içinde kâin ma‘den kaleminde hâlik-i mersûm Eğinli Bogos zimmî ismine mukayyed bir bâb tütüncü dükkânı derûnunda mevcûde beyne’l-esnâf gedik ta‘ bîr olunur hâlik-i mersûm Bogos zimmînin sağlığında bâ-sûret şirâen müstakillen malı olup ba‘de helâkihî müvekkillerim verese-i mesfûrâta mevrûs olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safka-i vâhide iki bin sekiz yüz guruş semen-i makbûza bi’l-vekâle mersûm Agop zimmîye bey‘ ve temlîk ve teslîm eylediğimde ol-dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allıka da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt etmemizle fî-mâ-ba‘d âlât-ı gedik-i mezkûr müstakillen mersûm Agop zimmînin mülk-i müşterâsı ve hakk-ı sarfı olup müvekkilelerim verese-i mesfûrâtın kat‘an alâka ve medhalleri kalmamışdır deyu ba‘de’l-ikrâr ve’t-tasdîk gedik-i mezkûrun hâlik-i mersûm ismine olan kayd-ı atîki kaleminden ref‘ ve terkīn ve müşterî-i mersûm Agop zimmî ismine tashîhan kayd ile yedine sûret i‘tâsını istid‘â ve gedik-i mezkûr mukayyed ve mu‘teber ve taht-ı nizâma dâhil kadîm gediklerden olduğunu ve bu makūle mu‘teber tütüncü gediklerinin bey‘ ve şirâsı vukū‘unda kethüdâ ve lonca ihtiyârları ma‘rifetleriyle İstanbul Mahkemesi’nden lede’l-i‘lâm ismine tashîhan kalemine kayd ile yedine sûret i‘tâsı bâ-fermân-ı âlî mer‘î ve mu‘teber şurût-ı nizâmlarından idüğünü esnâf-ı hâzirûn-ı merkūmûn ihbâr ve inhâ etmeleriyle bu sûretde istid‘âsı şurût-ı nizâma muvâfık olduğundan müsâ‘ade-i seniyyeleri erzânî buyurulup ber-mûceb-i şurût-ı nizâm gedik-i mezkûrun kayd-ı atîki terkīn ve mersûm Agop zimmî ismine tashîhan kayd ile kaleminden sûret i‘tâsı bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 24 Z sene [1]241