İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 137 Hüküm no: 109 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatab emininin, Sâbık Anadolu Valisi Derviş Paşa’nın muhallefâtından satın aldığı çenber sefinesi için kendisine mülkname verilmesini istediği Ma‘rûz Sâdır olan fermân-ı âlîlerine imtisâlen sa‘âdetlü defterdâr efendi bendelerinin işbu takrîriyle hatab emîni kullarının merbût olan diğer takrîr ve derkenâra nazar ve mütâla‘a olundukda Anadolu Vâlisi sâbık Derviş Paşa hazretlerinin cânib-i mîrîden zabt olan muhallefâtından emîn-i mûmâ-ileyhin iştirâ etmiş olduğu bir kıt‘a çenber sefînesinin mübâya‘ası ibâdullâhın def‘-i müzâyakaları zımnında olduğu beyân-birle gümrük emîni esbak Osman Paşa hazretleriyle Ahmed Ağa’nın çenberlerine kıyâsen çenber-i mezkûrdan hatab emînleri tarafından fiy’ât-ı mîrîye ile mübâya‘a-i hatab ve kömür mutâlebesiyle rencîde olunmaması yedine i‘tâ olunacak mülk-nâme-i hümâyûna derc kılınmasını mûmâ-ileyh takrîr-i mezkûruyla istid‘â ve fi’l-hakīka vezîr-i müşârun-ileyh ile Ahmed Ağa’nın inşâ eyledikleri çenberlerden mutâlebe-i mezkûre ile rencîde olunmamak bâbında otuz beş senesi Cumâdelâhire evâsıtına evâmir-i aliyye sudûr eylediği Dersaâdet’e hatab nakl eden sefîneleri senede bir def‘a nısf hamûleleri fiy’ât-ı mîrîye ile hatab emînlerine te’diye olundukdan sonra ziyâde mutâlebesiyle ashâb-ı sefâyine rencîde olunmamak husûsunda iki yüz bir senesi fermân-ı âlîşân verilmiş olduğu derkenârda müstebân olmağla bu sûretde Osman Paşa hazretleriyle Ahmed Ağa’nın [33a] çenberlerine kıyâsen emîn-i mûmâ-ileyh bendelerine istid‘âsı üzere mülk-nâme-i hümâyûn i‘tâsı re’y-i âlîlerine menût mevâddan idüğü İstanbul Mahkemesi’nden huzûr. Fî 25 Z sene [12]41