İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 137 Hüküm no: 110 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakız Adalı bir babanın, adada çıkan isyan sırasında esir düşen kızının Kara Mehmed b. Ahmed’in elinde olduğunu iddia ettiği Sakız üserâsından câriye-i mevtû’a men‘i ve 150 guruş mehr-i müeccel tesmiyesiyle tezevvücü Ma‘rûz Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar Sakız Cezîresi’nde vâkı‘ Mastaki kurâlarından Sulupotami? karyesi mütemekkinelerinden sâhibe-i arzuhâl mu‘arrefetü’ş-şahs Despino bt. Yani nâm nasrâniye meclis-i şer‘-i münîrde İstanbul’da Mercân kurbünde Çukur Hân’da Sahtiyâncı Kara Mehmed b. Ahmed nâm kimesne muvâcehesinde mezbûrun rıkka münkāde câriye-i müslime-i memlûke-i mevtû’ası Âdile hâzıra olduğu hâlde Sakız cezîresinde tuğyân ve gasbân eden re‘âyânın şer‘-i şerîf muktezâsınca kahr ve tedmîrleri husûsuna emr u fermân-ı hazret-i imâmü’l-mü’minîn sudûr etmiş ise de muahharan re’y ve emân verilen Mastaki karyesi re‘âyâlarının verilen fetvâ-yı şerîfe mûcebince seby ve istirkāk olunmamaları bâbında dahi emr-i cihân-mutâ‘-ı pâdişâh-ı rûy-i zemîn medallâhu zılâle ma‘deletihi alâ-mefâriki’l-müslimîn sâdır olmuş olmağla ol-vechile kızım hâzıra-i mezbûre istirkākı meşrû‘ olmayan benât-ı ra‘iyyetden iken askerî tâifesi muahharan padişâh-ı İslâm hazretleri izninsiz Mastaki karyelerini urdukları hînde kızım mezbûreyi esîr nâmıyla ahz edip el-yevm mezbûr Kara Mehmed’in yedinde bulmamla alıverilmek matlûbumdur dedikde mezbûr Kara Mehmed dahi cevabında mezbûre Âdile Sakız cezîresinde re’y ve emân verilmedin ahz olunan üserâdan olarak memûrlar taraflarından verilip Bahr-i Sefîd Boğazı’nda bakılan pençik mûcebince gāib ani’l-meclis Arab Hacıoğlu nâm esircinin rıkka münkāde câriye-i memlûkesi iken iki bin beş yüz guruş semen-i medfû‘a iştirâ eylediğimden sonra bi’r-rızâ İslâm’ı kabûl ve talebiyle ismi Âdile tesmiye olunup istifrâş dahi etmişdim deyip mezbûre Âdile dahi kendinin re’y ve emân verilmedin evvel vukū‘ bulan muhârebede ahz olunduğu ve rıkka inkıyâdını ikrâr ve i‘tirâf etmeğin bu sûretde ber-muktezâ-yı şerî‘at-i garrâ nasrâniye-i mersûmenin mutâlebesine hâzıra-i mezbûrenin İslâm’ı ve rıkka inkıyâdı mâni‘ olmağla ve da‘vâ-yı mezkûresi iltifâta şâyân olmadığından mâ‘adâ mezbûre Âdile nefsini yüz elli guruş mehr-i müeccel tesmiyesiyle tenzîhen merkūm Kara Mehmed’e huzûr-ı şer‘de tezvîc ve tenkîh ol-dahi tezevvüc ve tenakkuh eylediği İstanbul Mahkemesi’nden huzûr. Fî 24 Z sene [12]41