İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 138 Hüküm no: 111 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fesçi Süleyman Ağa b. el-Hâc Kasım’ın, Bafralı Mehmed b. İbrahim’den alacağını talep ettiği 440 guruş hüküm Sâhib-i arzuhâl Fesçi Süleyman Ağa b. el-Hâc Kasım meclis-i şer‘-i münîrde hân tüccârından Bafralı Mehmed b. İbrahim muvâcehesinde mezbûr Mehmed zimmetinde işbu târihden sekiz ay mukaddem beher vukıyyesi kırk dokuzar paraya olmak üzere yedimden ve malımdan iştirâ ve kabz eylediği on beş denk derûnunda mevzû‘ dokuz yüz vukıyye tütün semeninden alacak hakkım olan bin yüz on üç guruş otuz paranın altı yüz yetmiş üç guruş otuz parasını rızâmla hat ve tenzîl ve mutâlebesine müte‘allıka da‘vâdan mezbûrun zimmetini kabûlü hâvî ibrâ ve ıskāt etmemle bâkīsi olan dört yüz kırk guruşu mezbûr Mehmed’den taleb ederim deyu da‘vâ ettikde ol-dahi ber-vech-i muharrer ikrâr ve i‘tirâf ve meblağ-ı bâkī-i mezkûr dört yüz kırk guruşu müdde‘î-i mezbûr Süleyman Ağa’ya edâ ve teslîme ta‘ahhüd eylediği İstanbul Mahkemesi’nden huzûr. Fî 24 min Z sene [1]241