İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 140 Hüküm no: 114 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş b. Mehmed’in evinin altındaki tütüncü dükkânında kiracı olan Avanes v. Bedros’dan tütüncü gediğini başka bir yere nakletmesini istediği Tütüncü gediğini mahall-i âhara nakle ta‘ahhüd Ma‘rûz Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar tütüncü esnâfından Ankaralı Kuyumcuoğlu Avanes v. Bedros zimmî meclis-i şer‘-i münîrde derûn-ı arzuhâlde mastûru’l-ism Kalyoncu Ali Çavuş b. Mehmed muvâcehesinde esnâf-ı merkūme kethüdâsı Osman Ağa ve vekîli el-Hâc es-Seyyid Mustafa Ağa ve yazıcısı es-Seyyid Mehmed Nuri Ağa ve Yiğitbaşısı Molla Ahmed ve sâir lonca ihtiyârları hâzır oldukları hâlde hâmiş-i arzuhâlde mastûr ma‘den kaleminden muhrec sûret kaydı nâtık olduğu üzere mahrûse-i Galata’da Sava zimmî şerbethânesi karşısında domuzhâne ittisâlinde mezbûr Ali Çavuş’un menzili tahtında vâkı‘ şehriye altışar guruş kirâ-yı kadîmelü bir bâb tütüncü dükkânı derûnunda mevcûde kalem-i mezbûrda Kızanlıklı Yuvan zimmî ismine mukayyed taht-ı nizâma dâhil ve mu‘teber gedik ta‘bîr olunur âlât-ı lâzıme tedâvül-i eydî ile şirâ-ı malım iken dükkân-ı mezkûr bundan akdem harîkde muhterik oldukda malımdan külliyetli mebâliğ sarfıyla inşâya şurû‘ etmişdim lâkin dükkân-ı mezkûrun mutasarrıfı merkūm Ali Çavuş menziline idhâl için eşedd-i lüzûmu olduğundan masrûfum olan bin guruşu teberru‘an bana def‘ ve teslîm ve umûruma sarfla istihlâki emr eylediğinde ben dahi ahz ve kabz ve emri üzere umûruma sarfla istihlâk edip dükkân-ı mezkûru terk ve fî-mâ ba‘d ta‘arruz etmeyip mâlik olduğum âlât-ı gedik-i mezkûru kurb ve civârında dükkân tedârükiyle şurût-ı nizâmımız üzere nakle ta‘ahhüd etmemle ben bi’l-cümle hukūk-ı şer‘iyye ol-dahi bana medfû‘u olan meblağ-ı müstehlek-i merkūm bin guruşun istirdâdına müte‘allıka da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyu mukırr-ı mersûm Avanes zimmînin bi’l-cümle takrîr-i meşrûhu[nu] mezbûr Ali Çavuş tasdîk [34a] ve ba‘de’l-yevm dükkân-ı mezkûrda mu‘teber gedik olmayıp âhar mahalle nakl olunmak üzere menziline ilâveye müte‘ahhid ve bu vechile kat‘-ı nizâ‘ eyledikleri İstanbul Mahkemesi’nden huzûr. Fî 22 Z sene [12]41