İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 141 Hüküm no: 115 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Ağa b. Mehmed’in bir adet Yağlıkçı ve Keseci dükkânındaki hissesini zevcesi Fatma bt. İbrahim’e devrettiği Parçacı dükkânı ferâğı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar sâhib-i arzuhâl Kesecioğlu Ahmed b. Mehmed nâm kimesne bi’l-ma‘iyye istimâ‘a memûr nezâret-i hazret-i şeyhülislâmîde âsûde evkāf müfettişi müderrisîn-i kirâmdan Meşreb Efendi hafîdi fazîletlü Mehmed Ârif Efendi tarafından me’zûn mevlânâ es-Seyyid Mehmed Esad Efendi dâ‘îleriyle akd olunan meclis-i şer‘-i münîrde müştereki Fâtıma bt. İbrahim nâm hatunun zevci ve tarafından husûs-ı âtîde vekîl-i müsecceli el-Hâc Mehmed Ağa b. Mehmed muvâcehesinde nezâret-i hazret-i müşârun-ileyhde âsûde evkāfdan merhûm Abdüsselâm Vakfı müsakkafâtından İstanbul’da Çarşı-yı Kebîr’de Parçacılar sûkunda Şalîcı Simav ve Yağlıkçı Mehmed Ağa dükkânları beynlerinde kâin bir bâb yağlıkçı ve keseci dükkânının altı sehm i‘tibâriyle bir sehmi benim ve beş sehmi müvekkile-i mezbûre Havvâ Hatun’un bâ-temessük-i mütevellî bi’l-icâreteyn taht-ı tasarrufumuzda olmağla hâlâ ben ber-vech-i muharrer mutasarrıf olduğum bir sehm hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bin guruş bedel-i makbûz ve müstehlek mukābelesinde bâ-izn-i mütevellî müvekkile-i mezbûre Havvâ Hatun’a ferâğ ve tefvîz ve teslîm eylediğimde ol-dahi ber-vech-i muharrer tefevvüz ve kabûl etmekle ferâğ-ı mezkûrda şurût-ı müfside müdde‘âsına ve bedel-i müstehlek-i merkūmun istirdâdına ve bi’l-cümle husûs-ı mezkûra müte‘allıka âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt eyledik fî-mâ ba‘d dükkân-ı mezkûrun mecmû‘u mezbûre Havvâ Hatun’un re’y-i mütevellî ile müstakillen dâhil-i havza-i tasarrufu ve hakk-ı müfevvazı olup benim kat‘an alâkam kalmamışdır deyu takrîrini vekîl-i mezbûr el-Hâc Mehmed Ağa tasdîk ve bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî 29 Z sene [1]241