İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 142 Hüküm no: 116 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timur Bey’in, el-Hâc Mustafa Mestan Ağa b. Mehmed Halil’de kalan 3250 kuruş alacağını talep ettiği 3250 guruş hüküm Ma‘rûz Dergâh-ı Âlî lâğımcı zaîmlerinden sâhib-i arzuhâl Uzeyr Beyzâde Timur Bey meclis-i şer‘-i münîrde derûn-ı arzuhâlde mezkûrü’l-ism Dramalı el-Hâc Mustafa Mestan Ağa b. Mehmed Halil muvâcehesinde mezbûr el-Hâc Mustafa Mestan Ağa iki yüz kırk senesi mahrûse-i Selânik menzil emîni iken işbu yedimde olan mümzâ ve memhûr tahvîl mûcebince yedimden ve malımdan karz aldığı üç bin guruş ve sene-i mezbûrede mahrûse-i mezbûre vâlîsi vezîr-i mükerrem sa‘âdetlü atûfetlü Ömer Paşa hazretleri merkūm el-Hâc Mustafa Mestan Ağa’ya hil‘at ilbâs buyurduklarında ber-mu‘tâd-ı kadîm vâlî-i müşârun-ileyh hazretlerinin hademe ve ketebelerine verilecek altı yüz guruşu mezbûrun bi-şarti’r-rucû‘ emriyle kabzına memûra ben malımdan edâ etmemle ol-vechile bi’l-mürâca‘a alacağım olan meblağ-ı mezkûr altı yüz guruş ve mezbûrun birâderi olan Zihne a‘yânı el-Hâc Ali Bey mezbûrun menzil emânetinden afvı niyâzını hâvî vezîr-i müşârun-ileyhe tahrîr eylediği arzuhâli benimle irsâl ve takdîm etmekle ol-vechile kazâ-i mezbûrdan mahrûse-i mezbûreye gidip gelince eylediğim dört yüz dokuz guruş harcırâhımı mezbûr el-Hâc Mustafa Mestan Ağa kabûl ve edâya ta‘ahhüd eylediğine binâen ol-vechile dahi matlûbum olan dört yüz dokuz guruş ki min-haysü’l-mecmû‘ << mezbûr el-Hâc Mustafa Mestan >> dört bin dokuz guruşun ancak bin dokuz guruşu husûsundan mezbûr ile iki yüz elli guruş üzerine sulh olup ziyâdesi olan yedi yüz elli dokuz guruşu mutâlebesine müte‘allıka da‘vâdan mezbûrun zimmetini ibrâ ve ıskāt eylediğimde ol-dahi sulh ve ibrâ-i mezkûrumu kabûl etmeğin bu sûretde bedel-i sulh-ı merkūm iki yüz elli guruş ile cihet-i karzdan olan meblağ-ı merkūm üç bin guruşu mezbûr el-Hâc Mustafa Mestan Ağa’dan hâlâ taleb ederim deyu da‘vâ ettikde ol-dahi kaziyye minvâl-i muharrer üzere olup meblağayn-i mezkûreyn üç bin iki yüz elli guruş zimmetinde ciheteyn-i mezkûreteynden müdde‘î-i mezbûra sahîhan deyni olduğunu [34b] ikrâr ve i‘tirâf edip ancak ben meblağ-ı mezkûru umûr-ı mîrîye sarf etmiş olduğumdan cânib-i mîrîden alacağımı istîfâ etmedikçe meblağ-ı mezkûru edâ edemem deyu takrîr-i meşrûhu üzere îrâd eylediği kelâmı cevâb-ı şer‘î olmamağla ikrâr-ı mûcebince meblağ-ı mecmû‘-ı merkūm üç bin iki yüz elli guruşun müdde‘î-i mezbûra edâsıyla merkūm el-Hâc Mustafa Mestan Ağa şer‘an ilzâm olunduğu İstanbul Mahkemesi’nden huzûr. Fî Selh-i Z sene [12]41