Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 354 Hüküm no: 396 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Osman’ın alacaklarının vârislerinin vasîsi tarafından tahsil edildiği Mahmiye-i İstanbul’da Âşıkpaşa mahallesinde sâkin iken bundan akdem vefât eden Hasan Beşe b. Osman’ın verâseti zevce-i metrûkesi Neslihan nâm hâtun ile evlâd-ı sıgārı Mustafa ve Osman ve Süleyman’a ve kebîre kızı Hatice’ye münhasır olduğu şer‘an zâhir ve müte‘ayyin oldukdan sonra mezbûre Neslihan’ın hâlâ zevci olan Hüseyin Çelebi b. Abdullah nâm kimesne meclis-i şer‘-i şerîf-i enverde merkūme Hatice’nin zevci ve sıgār-ı mezkûrûnun tesviye-i umûrları için kıbel-i şer‘den mansûb vasîleri olan işbu sâhibü’l-kitâb Ali Beşe b. Mehmed mahzarında takrîr-i kelâm edip müteveffâ-yı mezbûr Hasan Beşe’nin Hâslar kazâsı müzâfâtından Ereğli kasabasında mahsûrü’l-esâmî kimesneler zimmetlerinde olan hakkını taleb ve da‘vâ ve ahz u kabz ve kendiye îsâle mezbûr Ali Beşe beni tarafından vekîl etmekle ben dahi ba‘de’l-kabûli’l-vekâle kasaba-i mezbûreye varıp zimem-i nâsda olan yirmi dört bin üç yüz akçeyi kabz ve getirip mezbûra teslîm eyledim meblağ-ı mezbûrda benim alâka ve medhalim ve bir vechile da‘vâ ve nizâ‘ım yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, el-Hâc Musa b. Hasan, el-Hâc Mustafa b. Tevekkül, Mehmed Çelebi b. İbrahim, Mehmed Çelebi b. Hüseyin, Ali b. Veli, Mustafa Beşe b. Ali.