Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 355 Hüküm no: 397 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Siyami’nin Ali Dede b. Musa’yı evini satmak ve borçlarını ödemek üzere vekil ettiği Fi’l-asl vilâyet-i Anadolu’da Aksaray kasabası mahallâtından Beldecik mahallesi ahâlîsinden olup mahmiye-i İstanbul’da Ali Paşa-yı Atîk mahallesinde mütemekkin olan Receb b. Siyami nâm kimesne meclis-i şer‘-i şerîf-i enverde mezbûr Beldecik mahallesi sükkânından bâ‘isü hâze’l-kitâb Ali Dede b. Musa nâm kimesne mahzarında bi tav‘ihî ikrâr ve takrîr-i kelâm edip silk-i mülkümde münselik olup mezbûr Belücek mahallesinde vâki‘ bir tarafdan Emir Ali mülkü ve bir tarafdan Mehmed Çelebi mülkü ve iki tarafdan tarîk-i hâs ile mahdûd üç bâb tahtânî oda ve havlu ve kenîfi müştemil mülk menzilimi cümle tevâbi‘ ve levâhıkı ile semen-i misline âhara bey‘ ve teslîm ve kabz-ı semene ve semen-i mezbûrdan işbu hâzır bi’l-meclis Ahmed b. Mehmed[‘e] cihet-i karzdan altı guruş deynimi ve mahalle-i mezbûre avâ[rı]z mütevellîsine olan beş esedî guruş ki cem‘an on bir guruş deynimi edâya ve teslîm ve bâkī kalırsa bana îsâl ve kabz ve îsâl mütevakkıf olduğu umûrun küllîsine tarafından mezbûr Ali Dede’yi vekîl ve nâib-i menâb nasb ve ta‘yîn eyledim dedikde ol dahi ber vech-i muharrer vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed b. el-Hâc Veli, Mehmed b. el-Hâc Ali, Ahmed b. Mehmed, Süleyman b. Receb.