İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 145 Hüküm no: 119 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir b. el-Hâc Süleyman’ın Galata’daki mahzenini Şerife Hanife bt. el-Hâc Yakub’un zabtettiği Galata’da eski yağ kapanında kahve gediği men‘i Ma‘rûz Sâhib-i arzuhâl Halatçı Abdülkādir b. el-Hâc Süleyman nâm kimesne Çarşamba günü sarây-ı hümâyûnda otağ-ı sadr-ı âlîde huzûr-ı sâti‘u’n-nûr-ı hazret-i vekâlet-penâhîlerinde bi’l-ma‘iyye istimâ‘a memûr Haremeyn-i Şerîfeyn müfettişi umdetü’l-mevâlîyyü’l-izâm Emin Beyefendizâde fazîletlü Abdülkādir Beyefendi dâ‘îleriyle akd olunan meclis-i şer‘-i münîrde derûn-ı arzuhâlde mezkûr[et]ü’l-ism Şerife Hanife bt. el-Hâc Yakub nâm hatun muvâcehesinde dârussa‘âdetü’ş-şerîfe ağası hazretleri nezâretlerinde âsûde Ayasofya-i Kebîr vakfı mütevellîsi kâtib ağa-yı müşârun-ileyh izzetlü es-Seyyid Ahmed Reşîd Efendi tarafından mürsel vekîli Câbî es-Seyyid Mehmed Ârif Ağa hâzır olduğu hâlde vakf-ı mezkûr müsakkafâtından mahrûse-i Galata’da Eski Yağ Kapanı nâm mahalde vâkı‘ bir tarafı yemenici dükkânı ve bir tarafı bezirhâne ve verâsı Ali Ağa mahzeni ve pîşgâhı tarîk-i âm ile mahdûd ayda kırk beşer akçe icâreli birbiri üzerinde kâin iki bâb kârgîr mahzen bâ-temessük-i mütevellî bi’l-icâreteyn müstakillen tasarrufumda iken mezbûre Şerife Hanife Hatun fevkānî mahzen derûnunda kahvehâne gediğim vardır deyu bi-gayrı hakkın fuzûlî zabt ve beni tasarrufdan men‘ etmekle keff-i yed ve bana teslîmine tenbîh olunmak matlûbumdur deyu da‘vâ ettikde ol-dahi cevâbında zikr olunan iki bâb mahzen müdde‘î-i mezbûr Abdülkādir’in tasarrufunda olduğunu ikrâr edip lakin vech-i muharrer üzere derûnunda kahveci gediği âlâtı mülküm olduğundan gayrı babam müteveffâ-yı mezbûr el-Hâc Yakub sağlığında Galata terzileri kethüdâsı olduğundan mahall-i mezbûr terzileri lonca odası olarak mu‘teber olmağla binâen aleyh zabt ederim deyu cevâba tasaddî etmeğin evvelâ kahvehâne gediği mukayyed olmadığı [35b] hâmiş-i arzuhâlde lonca odası nâmıyla dahi kayd bulunmadığı işbu arzuhâle merbût diğer arzuhâl hâmişine bâ-fermân-ı âlî baş-muhâsebeden başka başka derkenâr olunup ol-vechile mahall-i merkūmda bir gûne mukayyed gedik olmadığı zâhir olmağla bu sûretde bu makūle aklâm-ı hümâyûndan birinde li-ecli’l-i‘tibâr mukayyed olmayan gedikler şer‘an ve kānûnen mu‘teber olmayıp derûnunda havâî gediğim vardır deyu mahzen-i mezkûra müdâhaleye kādire olmadığı mezbûre Şerife Hanife Hatun’a tefhîm ve malı olan gedik âlâtını alıp mahzen-i mezkûru mutasarrıfı merkūm Abdülkādir’e teslîme tenbîh olunmağın mûcebince mahzen-i mezkûru mutasarrıfı mezbûr Abdülkādir’in keyfe mâ yeşâ’ zabt ve tasarrufu iktizâ eylediği İstanbul Mahkemesi’nden huzûr. Fî 27 Z sene [12]41