İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 146 Hüküm no: 120 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ulayıcı esnafının ustaları ile es-Seyyid Mehmed Tahir Usta b. Mehmed’in anlaşmazlığa düştükleri Ulayıcı esnâfının iş nizâ‘ları kat‘ı Ma‘rûz Hudâvendigâr-ı esbak cennet-mekân firdevs-âşiyân merhûm ve mağfiret-nişân-ı Sultân Ahmed Hân tâbe serâhû hazretlerinin Enderûn-ı Hümâyûn’da vâkı‘ kütüphâne-i celîleleri evkāfından İstanbul’da Fazlı Paşa Sarâyı bodrumunda kâin ulayıcı? esnâfından es-Seyyid Mehmed Tâhir Usta b. Mehmed meclis-i şer‘-i münîrde esnâf-ı merkūme kethüdâsı es-Seyyid Mehmed Ağa ve yiğitbaşısı es-Seyyid Mehmed İzzet Usta ve ihtiyârlarından el-Hâc Mehmed Sadık Ağa ve Mehmed Salih Ağa ve Ali Ağa ve es-Seyyid Osman Ağa ve es-Seyyid Mustafa Ağa ve sâirleri muvâcehelerinde esnâfımıza şakird olanlar üstâda hizmet ve tekmîl-i san‘at ile kesb-i mahâret edip ba‘dehû kethüdâ ve yiğitbaşı ve ihtiyâr ustalarımız ma‘rifetleriyle izin ve destûr verilip usta çıktıkdan sonra bir sene yevmiye dörder iş ve bir seneden sonra altışar iş ve orta yaşlı ustalara sekizer iş ve ihtiyârlara onar iş verilmek şurût-ı nizâm-ı kadîmimizden ve ben dahi usta çıkalı müddet-i vâfire olmuşiken ustalarımız merkūmûn bana şurût-ı nizâmımız üzere altışar iş vermeyip dörder iş teklîfiyle gadr dâ‘iyesinde olmalarıyla suâl olunup muktezâ-yı nizâm-ı kadîmimiz icrâ olunmak matlûbumdur deyu istid‘â ettikde onlar dahi cevâblarında nizâm-ı kadîmleri minvâl-i meşrûh üzere olduğunu ve müdde‘î-i mezbûr es-Seyyid Mehmed Tahir’in örf ve âdet ve usûl ve erkânları üzere usta çıkıp san‘atında mâhir ve perverde idüğünü tasdîk edip lâkin usta çıkalı bir sene tekmîl olmayıp kırk iki senesi recebinde tekmîl olmağla mukır ve mu‘terif olduğu şurût-ı nizâmımız üzere müddeti tekmîl oluncaya kadar dörder iş verilip müddeti tekmîl oldukdan sonra bilâ-noksân altışar iş veririz deyu ta‘ahhüd eylediklerinde müdde‘î-i mezbûr es-Seyyid Mehmed Tahir dahi ta‘ahhüdlerini kabûl edip bu vechile beynleri ıslâh ve musâfât olunduğ İstanbul Mahkemesi’nden huzûr. Fî 29 Z sene [12]41