İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 146 Hüküm no: 121 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin, es-Seyyid Hüseyin Çavuş b. Mehmed Emin’den bir cariye alıp ücretinde anlaşmazlığa düştükleri Câriye semenleri nizâ‘ı men‘i Ma‘rûz Dîvânhane-i âmire çavuşlarından es-Seyyid Hüseyin Çavuş b. Mehmed Emin meclis-i şer‘-i münîrde zeytinyağcı esnâfından Hasan Efendi muvâcehesinde mezbûr Hasan Efendi’nin babası ve esnâf-ı merkūme kethüdâsı el-Hâc Hüseyin Ağa b. Hasan hâzır olduğu hâlde benim hâzır-ı mezbûr ile beynimizde ahz ve i‘tâmız olmak münâsebetiyle ben otuz yedi senesi donanma-i hümâyûn ile Akdeniz cânibinde iken mezbûr Hasan Efendi’nin bana irsâl eylediği bir kıt‘a mektûbda tavsîf eylediğim vechile bana bir re’s Rumî câriye gönderesin deyu tahrîr etmekle ben dahi tahrîr ve tavsîfi üzere malımdan işbu meclis-i şer‘de mu‘âyene olunan bir re’s câriyeyi gönderip hâlâ kat‘-ı bâzâr ve mübâya‘a olunmayarak yedinde olmağla suâl olunup makbûlü ise kıymeti olan üç bin guruşa iştirâ edip makbûlü değil ise bana red ve teslîme merkūm Hasan Efendi’ye tenbîh olunmak matlûbumdur deyu da‘vâ ettikde ol-dahi cevâbında otuz sekiz senesi Rebî‘ülevveli’nin on beşinci günü mezbûr Hüseyin Çavuş Âsitâne-i aliyyeye geldikde câriye-i mezbûreyi tarafeynin îcâb ve kabûlüyle bâtten ve sahîhan altı yüz altmış guruşa bana bey‘ [36a] ve temlîk ve teslîm ben dahi vech-i muharrer üzere iştirâ ve temellük ve tesellüm eylediğimden sonra semen-i mezkûr altı yüz altmış guruşu yedimden tamâmen ve kâmilen ahz ve kabz edip târih-i mezbûrdan beri câriye-i mezbûre benim mal-ı müşterâm olduğunu ve kendinin kat‘an alâkası kalmadığını ikrâr ve i‘tirâf dahi etmişdi deyu mezbûr es-Seyyid Hüseyin Çavuş’un inkârına mukārin sûret-i def‘de eylediği mübâya‘a müddeâsını her birileri lede’t-tezkiyye adl ve makbûlü’ş-şehâde idükleri ihbâr olunan esnâf-ı merkūmeden Felekoğlu el-Hâc İbrahim Ağa b. el-Hâc İbrahim ve Mehmed Ağa b. Hüseyin nâm kimesneler şehâdetleriyle bi’l-müvâcehe vech-i şer‘î üzere isbât etmeğin bu sûretde câriye-i mezbûre merkūm Hasan Efendi’nin mülk-i müşterâsı olmağla merkūm es-Seyyid Hüseyin Çavuş da‘vâ-yı mezkûresiyle Hasan Efendi’ye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 21 Z sene [12]41