İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 147 Hüküm no: 122 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yanaki’nin, ev inşa ettiği Nefise Hanım bt. İsmail’den alacağını talep ettiği Ma‘rûz Tüccâr tâifesinden arzuhâl eden Panayot v. Yanaki nâm zimmî meclis-i şer‘-i münîrde mîr-i mîrân İbrahim merhûmun zevcesi derûn-ı arzuhâlde mezkûretü’l-ism mu‘arrefetü’z-zât Nefîse Hanım bt. İsmail mahzarında ben târih-i i‘lâmdan üç sene mukaddem mezbûre Nefîse Hanım’ın medîne-i Üsküdar’da Selimiye nâm mahalde vâkı‘ bir kıt‘a vakıf arsası üzerine beher zirâ‘ı ellişer guruş mukāvelesiyle iki yüz doksan altı zirâ‘ müceddeden bir bâb menzil binâ ve inşâ ve menzil-i mezkûr hâricine beher zirâ‘ı sekizer guruşa olarak yetmiş iki zirâ‘ taş duvar binâ ve inşâ ve tekmîl edip ba‘dehû keşf olunmaksızın menzil-i mezkûr taraf-ı şehinşâhîden bedel-i ma‘lûm mukābelesinde alınıp ebniyesi mukaddem olunmağla ebniye-i mezkûrenin kereste ve mismâr ve tuğla ve kireç ve horasan ve sâir levâzımâtına ve ücret-i amele ve menzil-i mezkûr lâğımları ve kapaklarına mezbûrenin bi-şarti’r-rucû‘ emriyle malımdan masrûfum olup bi’l-mürâca‘a alacak hakkım olan cem‘an on beş bin altı yüz bir guruşun on bir bin dört yüz yirmi beş guruşunu mezbûre Nefîse Hanım bana edâ ve teslîm ben dahi yedinden ahz ve kabz etmemle bâkīsi olan dört bin yüz yetmiş altı guruşu mezbûre Nefîse Hanım’dan taleb ederim deyu da‘vâya tasaddî eylediğimde ol-dahi kabzını mu‘terif olduğu meblağ-ı mezkûr on bir bin dört yüz yirmi beş guruşdan mâ‘adâ sana malımdan deynime mahsûben sekiz yüz elli guruş dahi verdiğimden masrûfun ol-mikdâra bâliğ olduğu ma‘lûmum değildir deyip ol-vechile beynimizde ba‘de vukū‘i’l-münâza‘a muslihûn tavassutuyla beynimiz te’lîf olunup ben tasaddî eylediğim meblağ-ı bâkī-i mezkûr dört bin yüz yetmiş altı guruş müdde‘âmdan mezbûre Nefîse Hanım ile bi’t-tav‘ ve’r-rızâ bin altı yüz guruş üzerine sulh olduğumda ol-dahi sulh-i mezkûru ba‘de’l-kabûl bedel-i sulh-i mezkûr bin altı yüz guruş ile yine menzil-i mezkûra sekiz sene mukaddem gāib ani’l-meclis Hacı Mustafa Ağa tavassutuyla binâ eylediğim duvar nizâ‘ından olan müdde‘âmdan mâ‘adâ bâlâda mezkûr ziyâde müdd‘eâm olan iki bin beş yüz yetmiş altı guruşa müte‘allıka da‘vâdan mezbûre Nefîse Hanım’ın zimmetini ol-dahi husûs-ı mezkûra müte‘allıka da‘vâdan benim zimmetimi her birimiz ibrâ-i âm ile kabûlü hâvî ibrâ ve ıskāt eyledik deyu ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin altı yüz guruş müdde‘î-i mersûm Panayot zimmîye zimmetinde sahîhan deyni olduğunu mezbûre Nefîse Hanım huzûr-ı şer‘de ikrâr ve ber-vech-i muharrer bi’t-taleb edâsıyla ilzâm olunduğu İstanbul Mahkemesi’nden huzûr. Fî 23 Z sene [12]41