İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 148 Hüküm no: 123 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivasî Çukadar Mehmed Ağa b. Hasan’ın alacaklılarının, borcunu erteleyip taksilendirdikleri 3281 guruş te’cîl Ma‘rûz Derûn-ı arzuhâlde mezkûrü’l-ism Sivâsî Çukadâr Mehmed Ağa b. Hasan ber-vech-i âtî dâyinlerinden olup ashâb-ı arzuhâlden yedinden ve malından iştirâ ve kabz eylediği ma‘lûmu’l-ecnâs ve’l-fiy’ât kereste semeninden dokuz bin dört yüz otuz sekiz buçuk guruşdan bâkī dört bin yedi yüz doksan dokuz buçuk guruş alacağının iki bin yüz yetmiş üç buçuk guruş mutâlebesinden ibrâ ile mâ‘adâ iki bin altı yüz yirmi altı guruş iddi‘â eden keresteci esnâfından Abdülhamid Ağa b. el-Hâc Ahmed ve ma‘lûmü’l-aded masnû‘ taş basamak ve tekne semenlerinden bâkī yüz seksen dört guruş alacağının yüz yirmi yedi guruşu mutâlebesinden ibrâ edip mâ‘adâ elli yedi guruş iddi‘â eden Taşçı Mehmed Ağa b. Ahmed ve ma‘lûmü’z-zirâ‘ ve’l-fiy’ât envâ‘-ı <> kafes semeninden yüz dört guruş alacağının otuz dokuz guruşu mutâlebesinden ibrâ edip mâ‘adâ altmış beş guruş iddi‘â eden Kafesçi es-Seyyid Süleyman Ağa b. es-Seyyid Mustafa ile kezâlik ma‘lûmü’z-zirâ‘ ve’l-fiy’ât envâ‘-i doğrama semeninden yedi yüz on guruş alacağının iki yüz yirmi altı <> guruşu mutâlebesinden ibrâ edip mâ‘adâ dört yüz seksen dört guruş iddi‘â eden İstanbul’da Deve Hânı civârında doğramacı Kiryako v. Nikola ve kereste ve süprüntü nakli ücretinden bâkī yüz otuz guruş alacağının seksen bir guruşu mutâlebesinden ibrâ edip mâ‘adâ kırk dokuz guruş iddi‘â eden merkebci Simon v. Yuvan nâm zimmîler meclis-i şer‘-i münîrde medyûnları merkūm Mehmed Ağa muvâcehesinde her biri takrîr-i kelâm edip bizim ber-vech-i bâlâ merkūmun zimmetinde esmân-ı mezkûrdan min-haysü’l-mecmû‘ alacağımız olan beş bin dokuz yüz yirmi yedi buçuk guruşun iki bin altı yüz kırk altı buçuk guruş mutâlebesine müte‘allika da‘vâdan merkūm Mehmed Ağa’nın zimmetini kabûlü hâvî ibrâ ve ıskāt etmemizle mâ‘adâsı olan üç bin iki yüz seksen bir guruşu dahi medyûnumuz mezbûrun hâlâ ve def‘aten bir vechle edâya iktidârı olmayıp ber-vech-i âtî te’cîl ve taksîte tâlib olduğundan biz dahi alacağımız olan meblağ-ı bâkī-i mecmû‘ mezkûr üç bin iki yüz seksen bir guruşun nısfı olan bin altı yüz kırk buçuk guruşu işbu sene-i mübâreke zilhiccetü’ş-şerîfesinin on beşinci günü ve nısf-ı âharı olan bin altı yüz kırk buçuk guruşu dahi iki yüz kırk iki senesi Saferü’l-hayrının on altıncı günü iki taksîtle bize edâ ve îfâ etmek üzere bi’t-terâzî medyûnumuz merkūku te’cîl ve taksît eyledik dediklerinde merkūm Mehmed Ağa tasdîk ve meblağ-ı bâkī-i mezkûr üç bin iki yüz seksen bir guruş müdde‘iûn-ı merkūmûna vech-i meşrûh üzere zimmetinde sahîhan deyni olduğunu ikrâr ve i‘tirâf ve ecel-i mezkûru kabûl ve meblağ-ı bâkī-i mezkûru ber-vech-i muharrer müeccelen ve mukassatan dâyinleri merkūmûna edâ ve îfâya müte‘ahhid olduğu İstanbul Mahkemesi’nden huzûr. Fî 15 min Şevval sene 1241