İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 149 Hüküm no: 124 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Sivaslı Mehmed Ağa b. Hasan’ın alacaklılarının borcunu erteleyip taksitlendirdikleri 424 guruş te’cîl Ma‘rûz Çukadâr Sivaslı Mehmed Ağa b. Hasan’ın ber-vech-i âtî dâyinlerinden olup ma‘lûmü’l-aded ve’l-fiy’ât kiremit semeninden bâkī iki yüz on yedi guruş alacağının otuz üç guruşu mutâlebesinden ibrâ edip mâ‘adâ yüz seksen dört guruş iddi‘â eden tuğlacı Vasil v. Yuvan zimmî ile ma‘lûmü’l-aded ve’l-fiy’ât teneke boru semeninden yüz guruş alacağının yirmi guruş mutâlebesinden ibrâ edip mâ‘adâ seksen guruş iddi‘â eden Tenekeci Mişon v. Salho nâm yahudi asâleten ve nakkāşlık ücretinden iki yüz on dört buçuk guruş alacağının elli dört buçuk guruşu mutâlebesinden ibrâ edip mâ‘adâ yüz altmış guruş iddi‘â eden Nakkāş beyli Salih Ağa b. Abdullah tarafından husûs-ı âtiyyü’l-beyânda vekîl olduğu Yusuf Ağa b. Osman ve Kafesci es-Seyyid Süleyman Ağa b. Mustafa nâm kimesneler şehâdetleriyle ber-nehc-i şer‘î sâbit olan keresteci esnâfından Abdülhamid Ağa b. el-Hâc Ahmed nâm kimesne vekâleten meclis-i şer‘-i münîrde medyûn-ı merkūm Mehmed Ağa muvâcehesinde her biri bi’l-asâle ve bi’l-vekâle takrîr-i kelâm edip bizimle müvekkil-i merkūmun mezbûr Mehmed Ağa zimmetinde ber-vech-i bâlâ alacağımız olan cem‘an beş yüz otuz bir buçuk guruşun [37a] yüz yedi buçuk guruşu mutâlebesine müte‘allıka da‘vâdan mezbûrun zimmetini kabûlü hâvî bi’l-asâle ve bi’l-vekâle ibrâ ve ıskāt etmemizle bâkīsi olan dört yüz yirmi dört guruşu dahi merkūmun hâlen ve def‘aten bir vechile edâya iktidârı olmayıp ber-vech-i âtî te’cîl ve taksîte tâlib olduğunda biz dahi meblağ-ı bâkī-i mezkûrun nısfı olan iki yüz on iki guruşu târih-i i‘lâm senesi zilhiccetü’ş-şerîfesi selhi günü ve nısf-ı âharı olan iki yüz on iki guruşu dahi iki yüz kırk iki senesi Rebî‘ülevvel gurresinde bizimle müvekkil-i mezbûra tamâmen ve kâmilen edâ ve îfâ etmek üzere merkūm Mehmed Ağa’yı bi’l-asâle ve bi’l-vekâle <> te’cîl ve taksît eyledik dediklerinde merkūm Mehmed Ağa tasdîk ve meblağ-ı bâkī-i mezkûr asîl ve müvekkil-i merkūmûna zimmetinde sahîhan deyni olduğunu ikrâr ve i‘tirâf ve ecel-i mezkûru kabûl ve meblağ-ı bâkī-i mezkûru asîl ve müvekkil-i merkūmûna ber-vech-i muharrer müeccelen ve mukassatan edâ ve îfâya müte‘ahhid olduğu İstanbul Mahkemesi’nden huzûr. Fî Selh-i Şevval sene 1241