İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 151 Hüküm no: 126 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarakçılar Çarşısı’nda bulunan kalpakçı dükkanının vakıf mütevellisi tarafından Serpohi bt. Avanes’e kiralandığı İmâma meşrûta olan tarakçı dükkânını imâm-ı mahalle mahlûlünden âhara îcârı Ma‘rûz İstanbul’da Tarakçılar sûkunda kâin merhûme Dâye Hatun Câmi‘-i Şerîfi imâmı sâhib-i arzuhâl es-Seyyid Süleyman Efendi b. es-Seyyid Hüseyin bi’l-ma‘iyye memûr Haremeyn-i Şerîfeyn müfettişi umdetü’l-mevâliyyü’l-izâm Emin Beyefendizâde fazîletlü Abdülkādir Beyefendi tarafından mürsel kâtib es-Seyyid Hüseyin Efendi dâ‘îleri hâzır olduğu hâlde akd olunan meclis-i şer‘-i münîrde şahsı mu‘arrefe Serpohi bt. Avanes nasrâniye muvâcehesinde nasrâniye-i mersûmenin zevci derûn-ı arzuhâlde mezkûrü’l-ism kalpakçı Atanos v. İsayi zimmî hâzır olduğu hâlde << akd olunan meclis-i şer‘-i münîrde şahsı mu‘arrefe Serpohi bt. Avanes nasrâniye muvâcehesinde >> ber-mantûk-ı kayd ve bâbüssa‘âdetü’s-seniyye ağası hazretleri nezâretlerinde âsûde evkāfdan galle ve tevliyeti câmi‘-i mezbûr imâmlarına meşrûta olup ol-vechile bi’l-meşrûta mütevellîsi olduğum ashâb-ı hayrâtdan merhûme Kamerî Hatun Vakfı müsakkafâtından zikr olunan Dâye Hatun mahallesinde hân-ı kebîr ittisâlinde kâin bir tarafı Rahîkî Ahmed Efendi vakfından tarakçı dükkânı ve bir tarafı vakf-ı mezkûrdan menzil ve tarafeyni tarîk-i âm ile mahdûd [ve] beher şehr onar akçe icâre-i müeccelelü bir bâb kalpakçı dükkânına mutasarrıfe olan Zâhide Hatun bt. Abdullah fevt olup dükkân-ı mezkûr sulbî kebîr oğlu Abdullah Efendi b. el-Hâc İsmail Râsih Efendi’ye âdiyen ba‘de’l-intikāl mezbûr Abdullah Efendi dahi bilâ-veled fevt olup dükkân-ı mezkûr mahlûl ve cânib-i vakf-ı şerîfe âid ve râci‘ olmağla hâlâ ben dükkân-ı mahdûd-ı mezkûru el-yevm mu‘accele-i mümâsili idüğü bi’l-ihbâr zâhir olan bin guruş mu‘accele ve müeccele-i kadîmesiyle bi’t-tevliye mersûme Serpohi nasrâniyeye îcâr ve teslîm ol-dahi ber-vech-i muharrer istîcâr ve kabûl ve mu‘accelesi olan meblağ-ı merkūm bin guruşu bana def‘ ve teslîm ve umûruma sarfla istihlâki emr eylediğinde ben dahi ahz ve kabz ve emri üzere umûruma sarfla istihlâk etmemle mu‘accele-i müstehleke-i merkūmenin adem-i istîfâsına ve bi’l-cümle husûs-ı mezkûra müte‘allıka da‘vâdan mersûme Serpohi nasrâniye benim zimmetimi kabûlümü hâvî ibrâ ve ıskāt etmekle fî-mâ-ba‘d dükkân-ı mahdûd-ı mezkûr mesfûre Serpohi nasrâniyenin dâhil-i havza-i tasarrufu ve hakk-ı müste’cir-i olmuşdur deyu imâm ve mütevellî-i merkūm es-Seyyid Süleyman Efendi’nin bi’l-cümle takrîr-i meşrûhunu mesfûre Serpohi nasrâniye tasdîk ve bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî Selh-i Zilhicce sene 1241