İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 152 Hüküm no: 127 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebûbekir Ağa b. Mustafa’nın, es-Seyyid Osman Ağa b. Osman’ın zimmetinde olan alacağını talep ettiği 600 guruşa sulh ve edâya tenbîh Sâhib-i arzuhâl Ebûbekir Ağa b. Mustafa nâm kimesne meclis-i şer‘-i münîrde derûn-ı arzuhâlde mezkûrü’l-ism Menav es-Seyyid Osman Ağa b. Osman nâm kimesne muvâcehesinde mezbûr Osman Ağa zimmetinde bin iki yüz otuz yedi senesi şehr-i Rebî‘ülevveli’nin yirmi birinci günü yedimden ve malımdan iktirâz ve kabz eylediği iki bin sekiz yüz yirmi yedi buçuk guruş ile mezbûrun bi-şarti’r-rucû‘ emriyle âhardan iştirâ ve oğlu gāib ani’l-meclis Tahir’e yine emriyle teslîm eylediğim ma‘lûmü’l-vasf ve’l-kıyme esvâb esmânından bi’l-mürâca‘a alacağım olan beş yüz yetmiş iki buçuk guruş ki cem‘an üç bin dört yüz guruşun iki bin altı yüz guruşunu bundan akdemce bana edâ ve teslîm ben dahi yedinden ahz ve kabz etmemle bâkīsi olan sekiz yüz guruşu mezbûr Osman Ağa’dan hâlâ taleb ederim deyu tasaddî eylediğim da‘vâmdan bâ-tavassut-ı muslihîn mezbûr Osman Ağa ile an-inkâr bi’t-tav‘ ve’r-rızâ altı yüz guruş üzerine sulh olduğumda ol-dahi sulh-i mezkûru ba‘de’l-kabûl bedel-i sulh-i mezkûr altı yüz guruşdan mâ‘adâ sekiz yüz guruşa varınca ziyâdesi olan iki yüz guruşa ve işbu târihe gelince sâir cemî‘-i hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini ibrâ-i âmm-i sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyu ba‘de’l-ikrâr ve’t-tasdîk ibrâdan müstesnâ bedel-i sulh-i mezkûr altı yüz guruş zimmetinde müdde‘î-i mezbûra vâcibü’l-edâ sahîhan deyni olduğunu tâyi‘an ve kat‘iyyen ikrâr ve i‘tirâf etmeğin alâ-mûcebi ikrârihî bedel-i sulh-i mezkûr altı yüz guruşun müdde‘î-i mezbûra edâ ve teslîmiyle merkūm Osman Ağa ilzâm olunduğu İstanbul Mahkemesi’nden huzûr. Fî 29 min Zilhicceti’ş-Şerîfe sene 1241