İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 152 Hüküm no: 128 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Yani’nin Avanes v. Asvador’u silahla yaraladığı İki yüz guruşa cerh sulhü İşbu takrîr bâlâsına sâdır olan fermân-ı âlîlerine imtisâlen medîne-i Üsküdâr’a muzâfe Yoros nâhiyesine tâbi‘ Anadoluhisarı’nda vâkı‘ dergâh-ı âlî kapıcıbaşılarından Yakub Bey’in hânesinde mütemekkin zikri [zikr-i] âtî mecrûh idüğü cerrâh el-Hâc Ahmed Efendi b. İbrahim nâm kimesne ihbârıyla mütehakkik olan Ayvaz Avanes v. Asvador nâm zimmî meclis-i şer‘-i hatîrde zikr olunan Anadoluhisarı’nda bakkal şakirdi olup derûn-ı takrîrde mastûru’l-ism Andon v. Yani nâm zimmî muvâcehesinde ser-bostâniyân-ı hâssa izzetlü ağa tarafından mürsel Bostanî Halil Ağa b. el-Hâc Salih nâm kimesne hâzır olduğu hâlde ben işbu târih-i i‘lâm şehri Zilhiccetü’ş-şerîfesinin dördüncü pazartesi günü ba‘de’l-asr saat on birde tuz iştirâsı’çün mersûmun mütemekkin olduğu bakkal dükkânına gider iken esnâ-yı râhda mersûm Andon zimmî dahi hisâr-ı mezkûr kale ağasının nevbetçisi kezâlik derûn-ı takrîrde ismi mezkûr gāib ani’l-meclis Emin nâm kimesnenin malı olan bir tek simli piştovunu gāib-i mezbûrun menziline götürürken zimmî-i mesfûra mülâkī olduğumda mesfûr Andon zimmî zikr olunan piştovunu bi-gayrı hakkın amden üzerime endaht edip kurşunu sağ diz kapağımın kemiği üzerine bir yerinden isâbet edip derûnunda kalmağla mûceb-i şer‘îsini taleb ederim deyu tasaddî eylediğim da‘vâmdan bâ-tavassut-ı muslihîn mesfûr Andon zimmî ile bi’t-tav‘ ve’r-rızâ iki yüz guruş üzerine sulh olduğumda ol-dahi sulh-i mezkûru ba‘de’l-kabûl bedel-i sulh-i merkūm iki yüz guruşu meclis-i <> sulhda mersûm Andon zimmî bana def‘ ve teslîm ben dahi yedinden tamâmen ahz ve kabz etmemle cerh-i mezkûra ve mâ yahdüsü anhüye müte‘allika âmme-i da‘vâdan mersûm Andon zimmînin zimmetini ibrâ-i âmm-i sahîh-i şer‘î ile kabûlü hâvî ibrâ ve ıskāt eyledim deyu ikrâr ve tasdîkleri İstanbul Mahkemesi’nden huzûr. Fî 6 Zilhicce sene 1241