İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 153 Hüküm no: 129 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Gürânî mahallesinden Ebûbekir Efendi b. Mehmed ile zevcesi Fatma bt. Abdullah’ın mahalleden çıkarıldığı Mahalleden ihrâc Ma‘rûz İstanbul’da Şeyh Ebu’l-Vefâ kurbünde Molla Gürânî mahallesi imâm vekîli Osman Efendi b. Mehmed ve ahâlîsinden Süleymaniye Câmi‘-i Şerîfi müezzin başısı İsmail Efendi b. Osman ve Sahhâf İbrahim Efendi b. Mehmed ve Sahhâf el-Hâc Ali Efendi b. el-Hâc Veliyyüddîn ve Hâfız Mehmed Ağa b. Mustafa ve Menav Hüseyin b. İbrahim ve el-Hâc Ahmed Ağa b. Mustafa ve es-Seyyid Mehmed Ağa b. Mustafa ve Tatar el-Hâc Ömer Ağa b. Halil ve es-Seyyid Sadullah Ağa b. es-Seyyid Mehmed Hâşim ve Yoğurtçu Ömer b. Süleyman ve sâirleri meclis-i şer‘-i münîrde mahalle-i mezbûre ahâlîsinden Ebûbekir Efendi b. Mehmed nâm kimesne muvâcehesinde mezbûr Ebûbekir Efendi ile zevce-i mutallakası gāibe ani’l-meclis Fâtıma bt. Abdullah nâm hatun mahallemiz ahâlîsinden olup lâkin kendi hallerinde ırzlarıyla mukayyedler olmayıp menzillerine mechûlü’l-ahvâl kimesneler duhûl ve hurûc ve dâimâ hilâf-ı şer‘-i şerîf hareketde bulunup ve kendilerine bi’d-defa’ât tenbîh olunmuş ise de kat‘an mütenebbihler olmayıp ızrârlarında ısrâr üzere olup ve mezbûre Fâtıma Hatun mahalle-i mezbûreden hurûc etmiş ise de mezbûr Ebûbekir Efendi[’nin] dahi mahalle-i mezbûreden hurûcunu iltimâs etmeleriyle mezbûr Ebûbekir Efendi dahi rızâsıyla mahalle-i mezbûreden hurûc ve âhar mahalleye nakle ta‘ahhüd eyledikde ahâlî-i mezbûrûn dahi râzılar olup şikâyetlerini te’hîr eyledikleri İstanbul Mahkemesi’nden huzûr. Fî 24 min Zilhicce sene 1241