İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 154 Hüküm no: 130 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoros nâhiyesindeki hamamın mütevellîsi tarafından İsmail Ağa b. Mehmed’e kiraya verdiği İcâre-i vâhide ile hamâm îcârı Ma‘rûz Dârussa‘âdetü’ş-şerîfe ağası hazretleri nezâret-i aliyyelerinde âsûde evkāfından Medîne-i Üsküdar’a muzâfe Yoros nâhiyesine tâbi‘ Yalı Karyesi Câmi‘-i Şerîfine eczâ-i şerîfe vaz‘ eden ashâb-ı hayrâtdan Otçubaşı esbak merhûm Mustafa Ağa vakfının mutlakā ekber evlâd-ı evlâdına meşrûta tevliyetine bi’l-meşrût mutasarrıf olan ekber evlâd-ı evlâd-ı vâkıfdan sâhib-i arzuhâl el-Hâc Mehmed Tahir Efendi b. Ömer bi’t-terâzî dâ‘îhânelerinde bi’l-ma‘iyye istimâ‘a memûr Haremeyn-i Şerîfeyn müfettişi umdetü’l-mevâlîyyü’l-izâm olan Emîn Beyefendizâde fazîletlü Abdülkādir Beyefendi tarafından mürsel es-Seyyid Mehmed Esad Efendi dâ‘îleriyle akd olunan meclis-i şer‘-i münîrde hâssa hasekilerinden derûn-ı arzuhâlde mezkûrü’l-ism İsmail Ağa b. Mehmed muvâcehesinde kezâlik derûn-ı arzuhâlde ismi mastûr Otçubaşı sâbık Hasan Ağa b. Süleyman hâzır olduğu hâlde vakf-ı mezbûr müsakkâfâtından karye-i mezkûrede vâkı‘ icâre-i vâhide ile âhara îcârı meşrûta ma‘lûmü’l-hudûd bir kıt‘a hamâmı sene-i sâbık Recebü’l-ferdi gurresinden beher şehr yirmi beşer guruş icâre-i vâhide ile hâzır-ı merkūm Hasan Ağa’ya îcâr etmişdim el-hâletü hâzihî hâzır-ı mezbûr ile olan akd-i icâre-i mezkûreyi bi’t-terâzî fesh eylediğimizden sonra işbu bin iki yüz kırk iki senesi Muharremü’l-harâmı gurresinden i‘tibâriyle hamâm-ı mezkûru el-yevm icâre-i misliyesi idüğü bi’l-ihbâr mütehakkik olan beher şehr elli bir guruş onar para icâre-i vâhide ile ber-mûceb-i şart-ı vâkıf ve amel-i kadîm mukaddemâ müste’ciri merkūm İsmail Ağa’ya bi’t-tevliye îcâr ve teslîm ve ücret-i mezkûrenin mâh-be-mâh otuzar guruşunu vakf için bana ve bir guruş on parasını dahi câmi‘-i mezkûrda cüz’-i şerîf kırâat eden kimesneye vazîfesine mahsûben edâ ve teslîm ve mâ‘adâ yirmişer guruşunu dahi hamâm-ı mezkûrun cüz’î ve küllî iktizâ eden ta‘mîr ve termîmine harc ve sarfa merkūm İsmail Ağa’ya bi’t-tevliye emr eylediğimde ol-dahi ber-vech-i <> muharrer istîcâr ve kabûl ve icâre-i mezkûreyi vech-i meşrûh üzere edâ ve mesârif-i ta‘mîri dahi ol-mikdâr ile idâre edip ziyâde masrûf mutâlebe etmemeğe ta‘ahhüd eyledi deyu mukırr-ı mütevellî-i mezbûrun bi’l-cümle takrîr-i meşrûhunu merkūm İsmail Ağa ile hâzır-ı mezbûr Hasan Ağa’dan her biri tasdîk ve bu vechile kat‘-ı nizâ‘ eyledikleri İstanbul Bâb Mahkemesi’nden huzûr. Fî Gurre-i M sene [1]242