İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 155 Hüküm no: 132 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Örücüler Çarşısı’ndaki dükkânını kilitleyerek başka bir diyara giden el-Hâc Mehmed Ağa’nın dükkânının açıldığı Örücü ve şalcı dükkânı küşâdı Ma‘rûz İstanbul’da Çarşı-yı Kebîr’de Örücüler sûkunda vâkı‘ Örücü Hacı Mehmed ve Bezzâz Şalcı Hacı Mustafa dükkânları beynlerinde kâin bir bâb örücü dükkânında müşâhereten ve müste’ciren sâkin Şalcı Bağdâdî Habeşoğlu el-Hâc Mehmed Ağa işbu târihden bir sene mukaddem dükkân-ı mezkûru mukaffelen terk ve ta‘tîl-birle diyâr-ı âhara firâr ve gaybet-i münkatı‘a ile gāib ve mefkūd olmağla dükkân-ı mezkûrun kuflü ma‘rifet-i şer‘le feth ve küşâd ve derûnunda mevcûd mütesâri‘u’l-fes[âd] olan eşyâsı semen-i misilleriyle âhara bey‘ olunup esmânı gāib-i mezbûrun hâli mütebeyyin oluncaya değin yed-i emîne vaz‘ ve dükkân-ı mezkûr kendüye teslîm olunmasını [ve] dükkân-ı merkūm hisse-i ma‘lûmesinin bâ-temessük-i mütevellî bi’l-icâreteyn mutasarrıfı ve derûnunda mevcûde beyne’l-esnâf örücü gediği ta‘bîr olunur âlât-ı lâzıme-i ma‘lûmenin müstakillen mâliki beylik kasabânından Bostanî Halil Ağa b. Ömer nâm kimesne bâ-arzuhâl istid‘â etmekle ol-bâbda sâdır olan fermân-ı âlîşâna imtisâlen cânib-i şer‘-i şerîfden mürsel kâtib es-Seyyid Ahmed Rızâ Efendi ma‘an meb‘ûs ümenâ-i şer‘den çukadâr Hüseyin Ağa b. Hüseyin ve Muhzır İsmail Çelebi b. Mahmud ile dükkân-ı mezkûra varıp abacı ve kaba bezez [bezzâz] esnâfının kethüdâsı Hâfız Mehmed Tahir Efendi b. Abdullah ve yiğitbaşısı Mehmed Said Ağa b. Mehmed Emin ve Bezzâzistânî Kırımî Osman Efendi b. Seyfullah ve Bağdâd tüccârından el-Hâc Kasım Ağa b. Mehmed Ali ve Bağdâdî Şalcı Hüseyin Ağa b. el-Hâc Mehmed ve Şalcı Bağdâdî el-Hâc Mehmed Ağa b. el-Hâc Kasım ve Şalcı Ali Ekber ve Şalcı Kemahlı Hüseyin Ağa ve Örücü el-Hâc Mehmed Ağa b. İsmail ve gāib-i mezbûrun kāyın pederi es-Seyyid Hâfız Mehmed Efendi b. el-Hâc Mustafa ile kāyın vâlidesi mu‘arrefetü’z-zât Fâtıma bt. nâm hatun hâzır oldukları hâlde dükkân-ı mezkûrun kuflünü feth ve küşâd ve gāib-i mezbûrun dükkân-ı mezkûrda olup mütesâri‘u’l-fesâd olan eşyâsı tahrîr ve semen-i misilleriyle bi’l-müzâyede âhara bey‘ olunup esmânı gāib-i mezbûrun hâli mütebeyyin oluncaya değin emîn ve mu‘temed olduğu bi’l-ihbâr zâhir olup kıbel-i şer‘den vasî nasb olunan gāib-i merkūmun zevcesi kezâlik zâtı mu‘arrefe Şerife Habibe bt. es-Seyyid Hâfız Mehmed nâm hatun yedine li-ecli’l-hıfz bâ-defter îdâ‘ ve teslîm-birle dükkân-ı mezkûr mutasarrıfı ve derûnunda mevcûde gedik mâliki merkūm Bostanî Halil Ağa’ya teslîm olunduğu İstanbul Mahkemesi’nden huzûr. Fî 15 Şevval sene 1241