İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 156 Hüküm no: 133 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Vasil v. İstavri ve kardeşi Dimitri’nin, kiracıları olan Kaspar v. Melkon ile kira akdini feshettikleri 120 guruşa sulh ve ibrâ Ma‘rûz Kürkçü Vasil v. İstavri ve li-ebeveyn er karındaşı Dimitri nâm zimmîlerden her biri meclis-i şer‘-i hatîrde Zernişancı Kaspar v. Melkon nâm zimmî muvâcehesinde mersûm Kaspar zimmî İstanbul’da Kürkçüler Hânı derûnunda nerdübân başında vâkı‘ mülk ve gediğine iştirâken mutasarrıf ve mâlikler olduğumuz bir bâb oda derûnunda şehriye yirmi dörder guruş icâre tesmiyesiyle müşâhereten müste’cirimiz iken biz bundan akdemce fesh-i akd-i icâre-birle zimmî-i mesfûru oda-i mezkûrdan ihrâc etmemizle ol-vechile mersûm Kaspar zimmî zimmetinde icâre-i mezkûr[e]den yirmi dört ayda müctemi‘ olan altı yüz guruş alacak hakkımızın bir def‘a doksan altı guruşunu ve bir def‘a dahi yüz yirmi altı guruşunu mukaddemâ bize edâ ve teslîm biz dahi yedinden ahz ve kabz etmemizle bâkīsi olan üç yüz yetmiş sekiz guruşunu mesfûr Kaspar zimmîden hâlâ taleb ederiz deyu tasaddî eylediğimiz da‘vâmızdan bâ-tavassut-ı muslihîn mersûm Kaspar zimmî ile bi’t-tav‘ ve’r-rızâ yüz yirmi beş guruş bedel-i medfû‘ ve makbûza sulh olduğumuzda ol-dahi sulh-i mezkûru ba‘de’l-kabûl mâ‘adâya ve bi’l-cümle husûs-ı mezkûra müte‘allıka âmme-i da‘vâdan mesfûr Kaspar zimmînin zimmetini ol-dahi ben sizin bi-şarti’r-rucû‘ emriniz ile oda-i mezkûrun ba‘zı iktizâ eden mahallerini malımdan iki yüz üç guruş sarfla ta‘mîr ve termîm etmemle masrûfum olan meblağ-ı mezkûr iki yüz üç guruşu bi’l-mürâca‘a sizden taleb ederim deyu inkârımıza mukārin tasaddî eylediği da‘vâsından meccânen fâriğ olup meblağ-ı mezkûr iki yüz üç guruş mutâlebesine ve bi’l-cümle husûs-ı mezkûra müte‘allıka âmme-i da‘vadan bizim zimmetimizi her birimiz ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyu ikrâr ve tasdîkleri İstanbul Mahkemesi’nden huzûr. Fî 19 Zilhicce sene [1]241