İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 157 Hüküm no: 134 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Ahmed Ağa b. Mustafa ile Şerife Zeliha bt. el-Hâc Süleyman’ın, kiracıları olan es-Seyyid Süleyman ile kira akdini feshettikleri Mukayyed olmayan havâî terzi dükkânını teslîme tenbîh Ma‘rûz Sâdır olan fermân-ı âlîlerine imtisâlen zikr-i âtî husûsun mahallinde ketb ve tahrîri’çün savb-ı şer‘-i enverden me’zûnen irsâl olunan Kâtib es-Seyyid Ahmed Rızâ Efendi bi’l-ma‘iyye rü’yete memûr Haremeyn-i şerîfeyn müfettişi Emin Beyefendizâde fazîletlü Abdülkādir Beyefendi tarafından mürsel kâtib Mehmed Râcih Efendi ve nezâret-i hazret-i sadrâzamîde âsûde evkāf müfettişi kibâr-ı müderrisîn-i kirâm-ı zevi’l-ihtirâmdan fazîletlü Mehmed Nidâî Efendi tarafından meb‘ûs kâtib Abdurrahim Hilmi Efendi hâssa mi‘mârı hulefâsından Mehmed Tahir ve Abdullah halîfeler ile mahrûse-i Galata hâricinde Eski Yağ Kapanı’nda Makaracılar sûkunda vâkı‘ Dârussa‘âdeti’ş-şerîfe ağası hazretleri nezâretlerinde âsûde evkāfdan Ayasofya-i Kebîr vakfı müsakkafatından olup tarafeyni Makaracı el-Hâc Halil Ağa ile Makaracı Topal Mustafa dükkânları ve verâsı nezâret-i hazret-i müşârun-ileyhde olan evkāfdan Rüstem Paşa Vakfı müsakkafâtından mukaddemâ Laz Hânı demekle ma‘lûm hân ve pîşgâhı tarîk-i âm ile mahdûd mi‘mârân-ı mezbûrân misâhalarıyla terbî‘an on iki zirâ‘ beş parmak bir bâb terzi dükkânına varıp huzûr-ı müslimînde akd-i meclis-i şer‘-i âlî ettiklerinde dükkân-ı mahdûd-ı mezkûrun bâ-temessük-i mütevellî bi’l-icâreteyn iştirâken ve şâyi‘an mutasarrıfları olan sâhib-i arzuhâl Tütüncü Ahmed Ağa b. Mustafa b. Ali ile Şerife Zeliha bt. el-Hâc Süleyman b. Osman nâm hatun taraflarından husûs-ı âtiyyü’l-beyânda vekîl olduğu zât-ı mezbûreyi ârifân Yemenici Ahmed Ağa b. Ali ve Ali Şakir b. Süleyman nâm kimesneler şehâdetleriyle ber-nehc-i şer‘î sâbit olan kuzâtdan Mustafa Efendi b. Mehmed nâm kimesne meclis-i ma‘kūd-ı mezkûrda derûn-ı arzuhâlde mezkûrü’l-ism terzi es-Seyyid Süleyman b. es-Seyyid Ömer nâm kimesne muvâcehesinde zikr olunan Ayasofya-i Kebîr Vakfı mütevellîsi kâtib-i hazret-i ağa-yı müşârun-ileyh Ahmed Raşid Efendi tarafından vekîl-i müsecceli câbî-i vakf Mehmed Şakir Efendi b. el-Hâc Abdullah ve müşârun-ileyh Rüstem Paşa Vakfı’nın mütevellîsi müderrisîn-i kirâm-ı zevi’l-ihtirâmdan Mîr Mehmed Tahir Efendi b. Mahmud Bey tarafından mürsel vekîli câbî-i vakf el-Hâc Mehmed İzzet Efendi b. el-Hâc Mustafa nâm kimesneler ile mahrûse-i Galata’da vâkı‘ abacı terzileri esnâfı kethüdâsı ve yiğitbaşları ve sâir bi’l-cümle ustaları hâzır oldukları hâlde mezbûr es-Seyyid Süleyman dükkân-ı mahdûd-ı mezkûrda müvekkilerim mezbûrânın beher şehr on beş guruş kirâ ile müşâhereten müste’cirleri olup târih-i i‘lâm şehri gāyetine izâfetle müvekkillerim mezbûrândan her biri fesh-i akd-i icâre etmeleriyle dükkân-ı mahdûd-ı mezkûru gāyet-i şehr-i merkūmdan tahliye ve müvekkillerim mezbûrâna teslîme merkūm es-Seyyid Süleyman’a tenbîh olunmak matlûbumdur deyu mütevellî vekîlleri hâzırân-ı mezbûrânın tasdîkleriyle bi’l-vekâle da‘vâ ettikde ol-dahi cevâbında dükkân-ı mahdûd-ı mezkûr müvekkilân-ı mezbûrânın ber-vech-i muharrer iştirâken tasarruflarında olduğunu ikrâr lâkin derûnunda olup aklâm-ı pâdişâhînin birinde mahalli tasrîhiyle mukayyed olmayan havâî abacı terzi gediği ta‘bîr olunur âlât-ı lâzıme-i ma‘lûme şirâen malım ve mülküm olmağla hurûcdan imtinâ‘ ederim deyu takrîrini kâtibân-ı merkūmân mahallinde ketb ve tahrîr ve ma‘an meb‘ûs ümenâ-i şer‘le hayme-i sadâret-penâhîde ma‘kūd meclis-i şer‘-i şerîfe gelip tarafeyn ve mütevellî vekilleri merkūmân ile esnâf-ı merkūmûn hâzır oldukları hâlde tasdîklerine mukārin alâ-vukū‘ihi ba‘de’l-inhâ ve’t-takrîr bu sûretde merkūm es-Seyyid Süleyman’ın takrîr-i meşrûhu üzere tasaddî eylediği havâî gedik da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle müvekkilân-ı mezbûrân için vekîl-i merkūm Mustafa Efendi’ye bî-vech-i şer‘î mu‘ârazadan ba‘de’l-men‘ ikrârı mûcebince dükkân-ı mezkûru gāyet-i şehr-i merkūmda tahliye-birle müvekkilân-ı mezbûrâna teslîme merkūm es-Seyyid Süleyman’a tenbîh olunduğu İstanbul Mahkemesi’nden huzûr. Fî 28 min Zilhicceti’ş-Şerîfe sene 1241