İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 158 Hüküm no: 135 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Osman b. es-Seyyid Mehmed’in Çukurçeşme’deki kahve dükkânında kiracısı Hüseyin Ağa b. Osman ile kira akdini feshettiği Kahve dükkânı teslîme ta‘ahhüd ve 150 guruş teslîm ile ibrâ Ma‘rûz Sâhib-i arzuhâl Kıyıcı Alâiyeli es-Seyyid Osman b. es-Seyyid Mehmed nâm kimesne bi’l-ma‘iyye rü’yete memûr Haremeyn-i şerîfeyn müfettişi olup Mekke-i Mükerreme pâyesiyle tekrîm buyurulan zâde-i Emîn Paşazâde [Emîn Beyefendi-zâde] fazîletlü Mîr Abdülkādir Efendi tarafından meb‘ûs kâtib Mehmed Ârif Efendi ma‘iyyetiyle akd olunan meclis-i şer‘-i enverde derûn-ı arzuhâlde mezkûrü’l-ism Kahveci Hüseyin Ağa b. Osman nâm kimesne muvâcehesinde Dârussa‘âdetü’ş-şerîfe ağası hazretleri nezâret-i aliyyelerinde olan evkāfdan Ayasofya-i Kebîr Vakfı müsakkafâtından İstanbul Kazasker Hamâmı civârında Çukurçeşme kurbünde kalaycı dükkânı karşısında kâin bir tarafdan vakf-ı mezbûrdan benim tasarrufumda olan manav dükkânı ve bir tarafdan yine vakf-ı mezbûrdan merkūmun tasarrufunda olan bahçe ve bir tarafdan vakf-ı âhardan yine mezbûrun tasarrufunda olan enserci dükkânı ve taraf-ı râbi‘i tarîk-i âm ile mahdûd dört kepenk bir bâb kahve dükkânı bâ-temessük-i mütevellî bi’l-icâreteyn benim taht-ı tasarrufumda ve derûnunda mevcûde aklâm-ı hümâyûndan kat‘an birinde mukayyed olmayan kahveci gediği ta‘bîr olunur bâ-defter-i müfredât eşyâ-i ma‘lûme merkūm Hüseyin Ağa’nın müstakillen malı olup ol-vechile derûnunda şehriye altı guruş kirâ ile müşâhereten müste’cirim olup lâkin ben işbu târih-i i‘lâm şehri gāyetine izâfetle fesh-i akd-i icâre etmemle dükkân-ı mahdûd-ı mezkûru gāyet-i şehr-i merkūmda tahliye ve bana teslîme mezbûr Hüseyin Ağa’ya tenbîh olunmak matlûbumdur deyu da‘vâya tasaddî etmişdim el-hâletü hâzihî muslihûn tavassutuyla beynimiz te’lîf ve tanzîm olunup merkūm Hüseyin Ağa dükkân-ı mahdûd-ı mezkûrda mevcûde malı olan eşyâ-i ma‘lûmesini ihrâc-birle dükkân-ı mahdûd-ı mezkûru gāyet-i şehr-i merkūmda bana teslîme ta‘ahhüd eylediğinde ben dahi merkūmun mukaddemâ dükkân-ı mahdûd-ı mezkûrun iktizâ eden mahallerinin teberru‘an li’l-vakf ta‘mîr ve termîmine malından masrûfu olan mebâliğ için malımdan teberru‘an yüz elli guruş kendüye def‘ ve teslîm ve umûruna sarfla istihlâki emr eylediğimde ol-dahi ahz ve kabz ve emrim üzere umûruna sarfla istihlâk etmekle bi’l-cümle husûs-ı mezkûra ve meblağ-ı müstehlek-i mezkûrun istirdâdına müte‘allıka da‘vâdan mezbûrun zimmetini kabûlü hâvî ibrâ ve ıskāt eyledim deyu ikrâr ve tasdîkleri İstanbul Mahkemesi’nden huzûr. Fî 21 min Zilhicceti’ş-Şerîfe sene [1]241