İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 159 Hüküm no: 136 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Mehmed’in halefi el-Hâc Hüseyin Ağa’nın, Hasan Ağa’nın nakit, hayvan ve eşyasını zabtettiği 3595 guruşa sulh Ma‘ruz Sâhib-i arzuhâl Alaşehir kazâsı ahâlîsinden Hasan Ağa b. Mehmed evvelâ Çarşamba günü hayme-i hazret-i sadâret-penâhîde ve ba‘dehû bi’t-terâzî İstanbul Mahkemesi’nde ma‘kūd meclis-i şer‘-i münîrde derûn-ı arzuhâlde mezkûrü’l-ism el-Hâc Hüseyin Ağa’nın pederi ve tarafından husûs-ı âtîde vekîl olduğu Süleyman Ağa b. Mehmed ve el-Hâc Hasan Ağa b. Hüseyin nâm kimesneler şehâdetleriyle ber-nehc-i şer‘î sâbit olan el-Hâc İbrahim Ağa b. Ali muvâcehesinde Aydın ve Saruhân sancakları mutasarrıfı esbak Dârendevî Hasan Paşa Hazretleri iki yüz otuz beş senesi martı ibtidâsından şubatı gāyetine gelince bir sene-i kâmile zabt etmek üzere Aydın sancağında vâkı‘ sâlifü’z-zikr Alaşehir kazâsına bâ-buyuruldu beni voyvoda nasb edip ba‘dehû livâeyn-i mezbûreyn paşa-yı müşârun-ileyhin üzerinden ref‘ ve sâdr-ı esbak Mehmed Derviş Paşa hazretlerine tevcîh buyuruldukda paşa-yı lâhık-ı müşârun-ileyh beni dört ay mürûrunda azl ve yerime müvekkil-i merkūm el-Hâc Hüseyin Ağa’yı nasb etmekle ol-dahi kazâ-i mezbûra geldikde malımdan altı yüz altmış guruş nakd ile mecmû‘u dokuz bin sekiz yüz seksen beş guruş kıymetli yüz elli re’s ağnâm ve üç re’s kara sığır ineği ve dört top a‘lâ Haleb sevâyisi ve bir kara Mahmûd-kârî şeşhâne tüfenk ve bir çift İngiliz-kârî tabanca ve üç Humus-kârî futa ve bir sofra ve bir peşkir ve bir sagīr bıçak ve bir güğüm ve beş gözlü bir sefer tası ve bir re’s siyah katırı bi-gayrı hakkın gasben almağla suâl olunup nakd-i merkūm ile hayvanât ve eşyâ-i mezkûre mevcûde ise aynılarını müstehleke ise mekân-ı gasbda olan kıymet-i şer‘iyyelerini müvekkil-i mezbûr el-Hâc Hüseyin Ağa’dan zamânen taleb ederim deyu da‘vâ eylediğimde ol-dahi cevâbında senin kazâ-i mezbûr voyvodalığından azl ve infisâlin hengâmında dâyinlerin paşa-yı müşârun-ileyhe arzuhâl etmeleriyle bâ-buyuruldu vürûd eden mübâşir ma‘rifeti ve ma‘rifet-i şer‘-i şerîfle nakid ve eşyâ-i mezkûreyi alacaklıların almışlar idi deyip kendi ahzını külliyen inkâr etmekle ben ber-vech-i muharrer müdde‘âmı isbât esnâsında muslihûn tavassutuyla beynimiz ıslâh ve tevfîk olunup tasaddî eylediğim da‘vâ-yı mezkûremden müvekkil-i merkūm ile bi’t-tav‘ ve’r-rızâ üç bin beş yüz doksan beş guruş bedel-i medfû‘ ve makbûza sulh olduğumda ol-dahi sulh-i mezkûru ba‘de’l-kabûl ziyâde müdde‘âma ve bi’l-cümle husûs-ı mezkûra ve sâir cemî‘-i hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini kabûlü hâvî bi’l-asâle ibrâ ve ıskāt eyledik deyu takrîrini vekîl-i mezbûr el-Hâc İbrahim Ağa tasdîk ve bu vechile külliyen kat‘-ı nizâ‘ ile beynleri te’lîf olunduğu huzûr. Fî 3 M sene 1242