İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 160 Hüküm no: 137 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğasıcı Anaştaş ve ortağı İstefan v. Mihal’in borçlarının taksitlendirildiği 1032 guruşu kabz mâ‘adâ 4139 guruşu üç seneye te’cîl Ma‘rûz Mübârek rikâb-ı kamer-tâb-ı hazret-i hilâfet-penâhîye takdîm-i arzuhâl eden bogasici esnâfından Anaştaş ve ‘ınânen şerîki İstefan v. Mihal zimmîlerin dâyinlerinden olup bogasi semeninden gayrı-ez teslîmât sahhe’l-bâkī beş yüz doksan guruş alacağının humusu olan yüz on sekiz guruşu ber-vech-i peşîn ahz ve mâ‘adâ dört yüz yetmiş iki guruşunu ber-vech-i âtî te’cîl eden Buldanlı Hasan Ağa b. el-Hâc İbrahim ve astar semeninden bâkī dokuz yüz seksen beş guruş alacağının yüz doksan yedi guruşunu ahz ve mâ‘adâ yedi yüz seksen sekiz guruşunu te’cîl eden Kastamonulu Ahmed Efendi b. el-Hâc Salih ve bogasi semeninden bâkī üç yüz yirmi yedi guruş alacağının altmış beş guruşunu ahz ve mâ‘adâ iki yüz altmış iki guruşunu te’cîl eden Denizlili Molla Ahmed b. el-Hâc Süleyman ve bogasi semeninden bâkī iki yüz guruş alacağının kırk guruşunu ahz ve mâ‘adâ yüz altmış guruşunu te’cîl eden Burdurlu Ahmed Efendi b. el-Hâc Âdem ve astar semeninden bâkī dört yüz altmış beş guruş alacağının doksan üç guruşunu ahz ve mâ‘adâ üç yüz yetmiş iki guruşunu te’cîl eden Kastamonulu Müezzinoğlu Mehmed b. Mehmed ve bogasi semeninden bâkī iki yüz dokuz guruş alacağının kırk bir guruşunu ahz ve mâ‘adâ yüz altmış sekiz guruşunu te’cîl eden Murâbıt Osman Ağa b. el-Hâc Mehmed nâm kimesneler asâleten ve bogasi semeninden bâkī beş yüz elli yedi buçuk guruş alacağının yüz on bir guruşunu ahz ve dört yüz kırk altı buçuk guruşunu te’cîl eden Karacasulu Köseoğlu el-Hâc Mehmed Ağa b. el-Hâc Mehmed’in li-ebeveyn er karındaşı ve tarafından husûs-ı âtîde vekîl olduğu esnâf-ı merkūme kethüdâsı Hâfız Mehmed Ağa b. Hâfız Ahmed ve merkūm Murâbıt Osman şehâdetleriyle sâbit olan Osman Ağa ve bogasi semeninden bâkī altı yüz on yedi buçuk guruş alacağının yüz yirmi üç guruşunu ahz ve dört yüz doksan dört buçuk guruşunu te’cîl eden Karacasulu Memiş oğlu el-Hâc Süleyman Ağa b. el-Hâc Süleyman tarafından kezâlik vekîl olduğu kethüdâ-yı merkūm Hâfız Mehmed Ağa ve mezbûr Mehmed şehâdetleriyle sâbit olan es-Seyyid Ahmed b. es-Seyyid Ali nâm kimesneler vekâleten ve bogasi semeninden bâkī beş yüz guruş alacağının yüz guruşunu ahz ve mâ‘adâ dört yüz guruşunu te’cîl eden Yani v. Dimitri ve dört yüz elli guruş alacağının doksan guruşunu ahz ve mâ‘adâ üç yüz altmış guruşunu te’cîl eden Ermiya v. Yuvakim ve iki yüz yetmiş guruş alacağının elli dört guruşunu ahz ve iki yüz on altı guruşunu te’cîl eden Yoseb v. Anatya zimmîler asâleten meclis-i şer‘-i münîrde medyûnları mesfûrân Anaştaş ve İstefan zimmîler muvâcehelerinde bizim mersûmân zimmetlerinde her biri âharın zimmetine lâzım gelen meblağa bi’l-emr ve’l-kabûl kefîl ve zâmin olarak yedimizden ve malımızdan iştirâ ve kabz eyledikleri ma‘lûmu’z-zirâ‘ ve’l-fiy’ât bogasi ve astar semenlerinden ba‘de külli’l-hesâb gayrı-ez teslîmât sahhe’l-bâkī min-haysü’l-mecmû‘ beş bin yüz yetmiş bir guruş alacağımız olup lâkin mesfûrânın deyn-i mecmû‘-ı mezkûru hâlen ve def‘aten edâya kudretleri olmadığından ber-vech-i âtî mukassatan edâya ta‘ahhüd ile istimhâl eylediklerinde biz dahi def‘aten mutâlebe ve hapis teklîfiyle tazyîk eylediğimiz sûretde ahz ve i‘tâlarına külliyen sekte gelerek alacaklarımızı külliyen edâdan âciz kalacakları âşikâr ve ber-vech-i muharrer taksîte rabtla tanzîm cümlemiz hakkında hayr olacağı bedîdâr olduğuna binâen zimmiyân-ı mersûmân deyn-i mecmû‘-ı mezkûrlarının humusu olan cem‘an bin otuz iki guruşu ber-vech-i bâlâ bize def‘ ve teslîm biz dahi ba‘de’l-ahz mâ‘adâsı olan cem‘an dört bin yüz otuz dokuz guruşu dahi târih-i i‘lâmdan beher sene hitâmında biner guruşdan üç sene tekmîlinde üç bin guruşunu ve sene-i râbi‘ada dahi ma‘a’l-fazla bin yüz otuz dokuz guruşu bize edâ ve teslîm biz dahi beher sene me’hûzumuzu alacaklarımıza göre alâ-tarîki’l-garâme beynimizde iktisâm etmek üzere rızâmızla mesfûrânı te’cîl ve taksît eyledik deyu asîl ve vekîl-i merkūmûnun bi’l-cümle takrîr-i meşrûhlarını mersûmân Anaştaş ve İstefan zimmîler tasdîk ve meblağ-ı bâkī-i merkūm dört bin yüz otuz dokuz guruş bâlâda tafsîl olunduğu vechile zimmetlerinde asîl ve müvekkilân-ı merkūmûna edâsı vâcib sahîhan deynleri olduğunu ikrâr ve i‘tirâf ve ber-vech-i muharrer müeccelen ve mukassatan edâya ta‘ahhüd eyledikleri İstanbul Mahkemesi’nden huzûr-ı âlîlerine i‘lâm olundu. Fî 3 min Zilka‘deti’ş-Şerîfe sene 1241