İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 162 Hüküm no: 138 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaptan Paşa’nın hazinedarı Ahmed Bey b. Hasan’ın eski vekilharcı Yorgi v. Kostandi’nin Ahmed Bey’den alacak iddiası 1320 guruşa sulh ve ibrâ Ma‘rûz Arzuhâl eden Yorgi v. Kostandi zimmî evvelen Çarşamba günü sarây-ı bihişt-âsâ-yı hümâyûnda orta kapı sâhasında mansûb otağ-ı hazret-i sadâret-penâhîde huzûr-ı ma‘delet-nüşûr-ı müşîrânelerinde ve ba‘dehû İstanbul Mahkemesi’nde ma‘kūd meclis-i şer‘-i münîrde Kapudan Paşa-yı esbak atûfetlü Hasan Paşa hazretleri hazînedârı Ahmed Bey b. Hasan muvâcehesinde ben ücret ile hizmet eder makūleden olup bin iki yüz otuz üç senesi Zilhiccetü’ş-şerîfesinde mîr-i mûmâ-ileyhe bi’t-taleb intisâb ile sekiz sene müddetde gerek Âsitâne-i aliyyede ve gerek diyâr-ı sâirede vekîlharclık hizmetinde olmamla müddet-i mezkûrede bi-şarti’r-rücû‘ emriyle umûr-ı ma‘lûmesine malımdan bâ-defter-i müfredât masrûfum olan mebâliğ-i ma‘lûmeden sahhe’l-bâkī alacağım olan yedi bin sekiz yüz seksen dokuz guruş ile mâhiyye ellişer guruş ecr-i mislimden sinîn-i mezkûrede müstahak olduğum dört bin sekiz yüz guruş ki cem‘an on iki bin beş yüz seksen dokuz guruşu mîr-i mûmâ-ileyhden taleb ve da‘vâya tasaddî eylediğimde ol-dahi cevâbında cem‘an masrûfun beş bin altı yüz on yedi guruş olup meblağ-ı mezkûru dahi sana tamâmen teslîm eylediğimden mâ‘adâ ücretine mahsûben üç bin iki yüz on iki guruşluk nakd ve eşyâ vermişdim deyu ziyâde iki bin yüz yetmiş iki guruş masrûfum ve ecr-i mislim ol-mikdâr olduğunu inkâr ve teslîmât husûsunda dahi inkârıma mukārin beni da‘vâ[ya] tasaddî ve ol-vechile ba‘de vukū‘i’l-münâza‘atü’l-kesîre muslihûn tavassutuyla beynimiz te’lîf olunup ben ber-vech-i muharrer tasaddî eylediğim da‘vâ-yı mezkûremden mîr-i mûmâ-ileyh ile bi’t-tav‘ ve’r-rızâ bin üç yüz yirmi guruşa sulh olduğumda ol-dahi sulh-i mezkûru ba‘de’l-kabûl bedel-i sulh-i mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve sâir cemî‘-i hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyu mukırr-ı mesfûr Yorgi zimmînin bi’l-cümle takrîr-i meşrûhunu mûmâ-ileyh Ahmed Bey tasdîk ve i‘tirâf etmeğin alâ-mûceb-i i‘tirâfihî ibrâdan müstesnâ bedel-i sulh-i mezkûr bin üç yüz yirmi guruşun bi’t-taleb müdde‘î-i mesfûra edâsıyla mûmâ-ileyh Ahmed Bey ilzâm olunduğu huzûr. Fî Gurre-i Muharrem sene 1242