İstanbul Mahkemesi 147 Numaralı Sicil (H. 1241-1242 / M. 1826) cilt: 89, sayfa: 163 Hüküm no: 139 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuru kahveci esnafından es-Seyyid Mehmed Ârif Ağa b. es-Seyyid Mehmed ile Ahmed Ağa b. Salih’in ortaklık akdini feshettikleri 1246 guruş 8 para bir akçe hüküm Âsitâne-i aliyyede vâkı‘ kurukahveci esnâfından es-Seyyid Mehmed Ârif Ağa b. es-Seyyid Mehmed meclis-i şer‘-i münîrde esnâf-ı merkūmeden Ahmed Ağa b. Salih muvâcehesinde ben esnâf-ı merkūmeden Örücülerli Mustafa Ağa b. Ali ile esnâf-ı merkūme kethüdâsı es-Seyyid Mustafa Ağa b. Ali ve müsin ve ihtiyârlarından Kayseriyeli el-Hâc Hüseyin Ağa b. Abdullah ve Tahtaminâreli Mehmed Sadık Ağa b. el-Hâc Ali ve Kızakcı el-Hâc Hüseyin Ağa b. Mehmed ve Kızakçızâde es-Seyyid Mehmed Emîn Ağa b. el-Hâc Halil ve es-Seyyid Mehmed Ağa b. es-Seyyid Hasan ve sâirleri hâzır oldukları hâlde işbu sene-i mübâreke Cumâdelâhire’nin beşinci günü malımdan iki bin yüz yetmiş sekiz guruş ve merkūm Ahmed Ağa dahi malından dört yüz guruş ifrâz ve birbirine halt ile iki bin beş yüz yetmiş sekiz guruşa iblâğ ve hâsıla olacak fâidenin sülüsânı benim ve sülüsü merkūmun olmak şartıyla kuru kahve bey‘ ve şirâsına ‘ınânen akd-i şirket ve re’s-i mal-ı mecmû‘-ı mezkûru beyyâ‘ ve kâbız-ı mal olan merkūm Ahmed Ağa’ya teslîm-birle İstanbul’da Koca Mustafa Paşa çarşısında kâin kurukahveci dükkânında sene-i mezbûre Zilhiccesi’nin yedinci gününe gelince yedi ay iki gün merkūmla şerîkler olup ba‘dehû fesh-i akd-i şirket-birle hesâbımızı lonca odasında kethüdâ ve ihtiyârlarımız hâzırûn-ı merkūmûn ma‘rifetleriyle tarafeynin defterlerine nazaran sehv ve galatdan ârî yegân yegân hesâb-ı sahîh ile rü’yet eylediğimizde merkūm Ahmed Ağa zimmetinde benim gerek re’s-i mal ve gerek fâide-i hâsıladan gayrı-ez teslîmât sahhe’l-bâkī bin sekiz yüz yirmi beş guruş yirmi üç para bir akçe ve hâzır-ı mezbûr Mustafa Ağa’nın dahi gerek iştirâ ve kabz eylediği Yemen kahvesi semeninden ve gerek cihet-i karzdan ba‘de-ez makbûz sahhe’l-bâkī sekiz bin yetmiş beş guruş yirmi beş para alacak hakkım zuhûr <> ve hâzır-ı mezbûr Mustafa Ağa meblağ-ı mezkûru mezbûrdan kabza beni tevkîl ben dahi kabûl edip ol-vechile bi’l-asâle ve bi’l-vekâle alacağım olan cem‘an on bin beş yüz yetmiş altı guruş sekiz para bir akçenin dokuz bin üç yüz otuz guruşunu ma‘lûmu’l-esâmî kimesneler zimmetlerinde alacağı olan ol-mikdâr guruş ile bi’l-müvâcehe şerâ’it-i şer‘iyyesi üzere havâleten îfâ etmekle bâkīsi olan bin iki yüz kırk altı guruş sekiz para bir akçeyi dahi merkūm Ahmed Ağa’dan asâleten ve vekâleten taleb ederim deyu hâzır-ı merkūm Mustafa Ağa’nın tasdîkiyle da‘vâ ettikde ol-dahi cevâbında kaziyye minvâl-i muharrer üzere olduğunu ve ber-vech-i meşrûh rü’yet-i hesâb eylediklerini ve lede’l-muhâsebe sahhe’l-bâkī merkūm bin iki yüz kırk altı guruş sekiz para bir akçe ciheteyn-i mezkûreteynden zimmetinde asîl ve vekîl-i merkūm es-Seyyid Mehmed Ârif Ağa’ya edâsı vâcib sahîhan deyni olduğunu ikrâr ve i‘tirâf etmeğin alâ-mûcebi ikrârihî meblağ-ı bâkī-i merkūm bin iki yüz kırk altı guruş sekiz para bir akçenin müdde‘î-i mezbûra edâsıyla merkūm Ahmed Ağa ilzâm olunduğu huzûr. Fî 14 Zilhicce sene 1241