İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 63 Hüküm no: 11 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadaret Mektupçusu Mehmed Arif Bey’in, Nakkaş Mehmed Sadık b. Mustafa’ya konak tamirinden borcu olduğu Ma‘rûz Ricâl-i Devlet-i Aliyye’den sâbıkā mektûbî-i hazret-i sadâret-penâhî izzetlü Mehmed Ârif Beyefendi bendelerinin işbu takrîri bâlâsına şeref-bâş-ı [bahş-ı] sahîfe-i sudûr olan fermân-ı âlem-mutâ‘larına imtisâlen zikri câ’î husûsu mahâllinde ber-nehc-i şer‘î istimâ‘ için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri [ve] hâssa mi‘mârı hulefâsından İsmail Kemâlî ve Mehmed Necib Halîfeler ile İstanbul’da Koska kurbünde Mi‘mâr Kemâleddin mahallesinde vâki‘ mîr-i mûmâ-ileyhin sa‘âdethânelerine varıp cerîde-i şer‘iyyede mazbûtü’l-esâmî Müslimîn huzûrlarında akd-i meclis-i şer‘-i âlî ettikde derûn-ı takrîrde mezkûru’l-ism Nakkāş Mehmed Sâdık b. Mustafa nâm kimesnenin li-ebeveyn er karındaşı ve tarafından husûs-ı âtîde taleb ve da‘vâ ve ahz ü kabza ve husûmete ve lede’l-iktizâ sulh ve ibrâya ve bunlar mütevakkıf olduğu umûrun küllîsine vekîl olduğu Mehmed Emin Ağa b. Mehmed ve Hüseyin Hasib Ağa b. Abdurrahman nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Mustafa nâm kimesne meclis-i şer‘-i münîrde mûmâ-ileyh Mehmed Ârif Beyefendi muvâcehelerinde mîr-i mûmâ-ileyh işbu derûnunda akd-i meclis-i şer‘-i âlî olunan sa‘âdethânelerini târih-i i‘lâmdan bir sene mukaddem karındaşım müvekkilim mezbûr yediyle ta‘mîr ettirmiş olmalarıyla ol vechile karındaşım mezbûrun konağ-ı mezkûra mâlından masrûfu bu def‘a ma‘rifet-i şer‘-i şerîf ve mi‘mârân-ı mezbûrân ve sâir ahvâl-i ebniyeye vukūf-ı tâmları olan bî-garaz kimesneler ma‘rifetleriyle ber-vech-i defter-i müfredât üzre keşf ve mu‘âyene ve ba‘dehû mi‘mâr-ı mûmâ-ileyh ma‘rifetiyle fiyâtı tahmîn ve takvîm-birle defter olundukda min-haysü’l-mecmû‘ yirmi dört bin otuz yedi buçuk guruş elli yedi akçeye bâliğ olmağla meblağ-ı mezkûrdan mîr-i mûmâ-ileyhin karındaşım müvekkilim mezbûra ceste ceste teslîm eyledikleri yirmi bir bin beş yüz guruş lede’t-tenzîl bâkī iki bin beş yüz otuz yedi buçuk guruş elli yedi akçe mîr-i mûmâ-ileyhin zimmetlerinde karındaşım müvekkilim mezbûra deynleri zuhûr edip edâya müte‘ahhid oldular deyü takrîrini mîr-i mûmâ-ileyh tasdîk eylediğini mevlânâ-yı mûmâ-ileyh mahâllinde istimâ‘ ve tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr. Fî 5 M sene [1]242