İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 64 Hüküm no: 12 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Usta b. Mehmed’in, Vartan v. Kikor’a dükkân tamirinden borcu olduğu Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde ber-nehc-i şer‘î istimâ‘ ve fasl ü hasm için savb-ı şer‘-i enverden me’zûnen bi’l-hükm irsâl olunan Kâtib es-Seyyid Salih Afîf Efendi dâ‘îleri hâssa mi‘mârı hulefâsından İsmail Kemâleddin ve Ahmed Ârif Halîfeler ile İstanbul’da Saraçhânebaşı’nda İbrahim Paşa Hamamı karşısında köşede nahılcı dükkânı ittisâlinde vâki‘ şekerci dükkânına varıp esnâf-ı merkūme kethudâsı Hasan Ağa ve yiğitbaşısı İbrahim Ağa ve ustalarından Mehmed Ağa ve Abdullah Ağa ve Mehmed Ağa ve Osman Ağa ve sâirleri hazır oldukları hâlde akd-i meclis-i şer‘-i şerîf ettikde neccâr kalfalarından sahib-i arzuhâl Vartan v. Kirkor zimmî meclis-i ma‘kūd-ı mezkûrda esnâf-ı merkūmeden olup dükkân-ı mezkûr gediğinin rub‘-ı şâyi‘ine mâlik olan derûn-ı arzuhâlde mezkûru’l-ism Ahmed Usta b. Mehmed muvâcehesinde dükkân-ı mezkûr bundan akdem havâlî-i mezkûrede vukū‘ bulan harîk sebebiyle zedelenmiş olduğundan mezbûr Ahmed Usta’nın bi-şartı’r-rücû‘ emriyle mâlımdan tecdîd-gûne ta‘mîr etmemle masrûfum olan bin dokuz yüz guruşun yedi yüz guruşunu mezbûr Ahmed Usta’dan ahz etmemle bâkīsi olan bin iki yüz guruşu dahi mezbûr Ahmed Usta’dan bi’l-mürâca‘a taleb ederim deyü da‘vâ eylediğinde ol dahi cevâbında ber-vech-i muharrer emrini [3a] ikrâr edip masrûfum ol mikdâr olduğunu inkâr etmekle fenn-i mi‘mârîye üzre keşfolunmakda iken muslihûn tavassutuyla beynimiz ıslâh olunup ben ber-vech-i muharrer tesâddî eylediğim bin iki yüz guruş masrûf müdde‘âmdan mezbûr Ahmed Usta ile bi’t-tav‘ ve’r-rızâ üç yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûr üç yüz guruşdan mâ‘adâ ziyâde müdde‘âma ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini merkūm Ahmed Ağa tasdîk ve ibrâdan müstesnâ bedel-i sulh-ı merkūm üç yüz guruş zimmetinde müdde‘î-i mesfûr Vartan zimmîye deyni olduğunu ikrâr ve i‘tirâf etmeğin alâ-mûcibi ikrârihî bedel-i sulh-ı merkūm üç yüz guruşun müdde‘î-i mersûm Vartan zimmîye edâsıyla merkūm Ahmed Usta’yı ilzâm eylediğini kâtib-i mezbûr dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip tarafeyn hazır oldukları hâlde tasdîklerine mukārin alâ-vukū‘ihî inhâ ve takrîr eylediği ba‘de’t-tenfîz İstanbul Mahkemesi’nden huzûr. Fî 14 M sene [1]242