İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 65 Hüküm no: 13 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir b. Ali’nin, peşin ödenen dükkân kirası hususunda Mehmed Sadık Ağa’dan alacağı olduğu Ma‘rûz Sahib-i arzuhâl Ebûbekir b. Ali nâm kimesne bi’l-ma‘iye rü’yete me’mûr mîrî kâtibi müderrisîn-i kirâm-ı zevi’l-ihtirâmdan Salih Paşazâde fazîletlü el-Hâc Mehmed Âsım Beyefendi ile akd olunan meclis-i şer‘-i münîrde derûn-ı arzuhâlde mezkûru’l-ism örücü esnâfından Mehmed Sâdık Ağa b. Hasan nâm kimesne muvâcehesinde işbu yedimde olup sene-i sâbıkā Muharremi’l-harâmının ikinci günü târihiyle müverraha bir kıt‘a hüccet-i şer‘iyye nâtıka olduğu üzre mezbûr Mehmed Sâdık Ağa İstanbul’da Hasan Paşa Hânı kurbünde Simkeş Han kapısı karşısında hekîm dükkânı ittisâlinde vâki‘ bir bâb vakıf tütüncü dükkânı bâ-temessük-i mütevellî bi’l-icâreteyn taht-ı tasarrufumda ve derûnunda mevcûde gedik ta‘bîr olunur âlât-ı lâzıme-i ma‘lûme dahi bâ-hüccet kendi mülkümdür deyü sene-i mezkûre Muharremi gurresinden kırk üç senesi Zilhicceti’ş-şerîfesi gāyetine gelince üç sene tamamına dek bin sekiz yüz guruşa bana îcâr ve teslîm ve icâre-i mezkûrenin iki seneliğine isâbet eden bin iki yüz guruşu peşîn alıp ben dahi dükkân ve gedik-i mezkûru ancak on ay on gün zabtettikden sonra dükkân-ı mezkûr ile derûnunda olan gedik kendi mâlik ve mutasarrıf olmadığına binâen bu esnâda cânib-i mîrîden zabtolunup intifâ‘ mümkün olmadığından fesh-i akd-i icâre etmemle ber-vech-i muharrer peşînen medfû‘um olan meblağ-ı mezkûr bin iki yüz guruşdan zabteylediğim on ay on güne isâbet eden mikdârdan ziyâdesi olan altı yüz seksen üç guruş kırk akçeyi merkūm Mehmed Sâdık Ağa’dan istirdâd ederim deyü da‘vâ ettikde ol dahi cevâbında sâlifü’z-zikr dükkân ve âlât-ı lâzımeyi kendim mâlik ve mutasarrıfım deyü müddet-i mezkûre tamamına değin ber-mûcib-i hüccet-i şer‘iyye bin sekiz yüz guruşa müdde‘î-i mezbûr Ebûbekir’e îcâr ve iki seneliğini ber-vech-i peşîn kabz eylediğini ikrâr edip lâkin dükkân-ı mezkûr hakīkatde benim mâlım olmayıp ber-muktezâ-yı şer‘-i şerîf rûy-i arzdanizâle olunan havene-i Yeniçeriyândan elli altı bölük kışlasının mâlı makāmında olmağla ben dahi makbûzumu mezbûr Ebûbekir’in ma‘lûmu olmaksızın kışla-i mezkûra sarf etmişdim demesi def‘-i şer‘î olmamağın bu sûretde ber-mûcib-i fetvâ-yı şerîfe müste’cir-i merkūmun zabteylediği müddete isâbet eden mikdârdan ziyâde olan altı yüz seksen üç guruş kırk akçeyi mezbûr Ebûbekir’e red ve teslîme mezbûr Mehmed Sâdık Ağa’ya tenbîh olunduğu İstanbul Mahkemesi’nden huzûr. Fî 7 M sene [1]242