Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 357 Hüküm no: 400 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Osman’ın alacaklarını vârislerinin tahsil ettiği Mahmiye-i İstanbul’da Âşıkpaşa mahallesi sükkânından olup bundan akdem vefât eden Hasan Beşe b. Osman’ın verâseti zevce-i metrûkesi Nesli nâm hâtun ile sulbî sagīr oğulları Mustafa ve Osman ve Süleyman ve sulbiye kebîre kızı Hatice’ye münhasır olduğu şer‘an zâhir ve müte‘ayyin oldukdan sonra mezbûre Hatice’nin zevci ve tarafından husûs-ı âti’l-beyâna vekîl-i müsecceli ve sıgār-ı mezkûrûnun tesviye-i um[ûr]ları için kıbel-i şer‘den mansûb vasîleri olan Ali Beşe b. Mehmed meclis-i şer‘-i şerîf-i enverde işbu bâ‘isü’l-kitâb Hüseyin Çelebi b. Abdullah mahzarında ikrâr-ı tâm ve takrîr-i kelâm edip müteveffâ-yı mezbûr Hasan Beşe ile şerîki olup fevt olan Ahmed Beşe b. Osman’ın Hâslar kazâsı müzâfâtından kasaba-i Ereğli’de zimem-i nâsda olan hakların cem‘ ve tahsîl ve ahz u kabza ve îsâle mezkûr Ahmed Beşe’nin veresesi ile mezbûr Hüseyin Çelebi’yi taraflarımızdan vekîl eylediğimizde ol dahi vekâlet-i mezbûru kabûl ve müteveffiyân-ı mezbûrânın anda zimem-i nâsda olan yetmiş bir bin altı yüz akçeyi bi’l-vekâle kabz edip geldikde hâlâ beynimizde hesâb gördükde meblağ-ı mezbûrun yirmi dört bin üç yüz akçesi mezkûr Hasan Beşe’nin malı olduğu sâbit ve mütehakkik olmağla meblağ-ı mezbûru yedinden kabz eyledim min ba‘d meblağ-ı mezbûra müte‘allika her birimizin âhar ile da‘vâ ve nizâ‘ımız kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî evâili Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Musa b. Hüseyin, Mehmed Çelebi b. İbrahim, Mehmed Çelebi b. Hüseyin, Ali [b.] Hüseyin, Mustafa b. Ali, Osman b. Halil.